Sara Vilbergsdóttir

Síðbúin sólbrúnka og heimkoma!

2007-05-31T13:54:00.001Z

grillið
Originally uploaded by sara johanna.

Jæja, nú er ég komin heim í ferskan vindblæinn, skaðbrennd á lærunum og Gísli á maganum..... ;)
Við skelltum okkur í fyrsta sinn á grillið í sundlaugagarðinum síðasta daginn okkar, enda orðin heimilislaus kl.12 eins og alltaf er á hótelum síðasta daginn og flugið ekki fyrr en 10 um kvöldið. Við vorum bara svo óheppin/heppin að akkúrat þennan dag snarbatnaði veðrið, það var nánast heiðskýrt og steikjandi hiti.
Við mættum svo á flugvöllinn eins og kolamolar og hinar golf-grasekkjurnar sem legið höfðu á grillinu allan tímann urðu bara fúlar......: þið sem voruð hvít í gær þegar við hittum ykkur og komið svo í dag steikt af sól!!! og við búnar að streða við sólböð allan tímann og erum ekkert brúnni!!!!
Ég huggaði þær með því að við værum bara dökk á köflum, eiginlega eins og bútasaumsteppi úr rauðu, brúnu og fannhvítu efni. Þannig er ég t.d. eldrauð og brennd framan á lærunum en snjaka hvít aftan á þeim. Maginn er eins og langsoðinn kjúklingur á litinn en bringan eins og blóðug nautasteik og svona má lýsa öllum skrokknum. Þar að auki lá við að við yrðum að standa upprétt í flugvélinni vegna brunans - og helst án fata , ekki þægilegt þegar fötin nuddast við brunann. Samt var ég með sólarvörn með tölunni 30! Sterk sólin þarna næstum við miðbaug.
Flugið tók 5 og hálfan tíma, sem skotgekk á leiðinni út en virkaði sem heil eilífð á leiðinni heim. Ég get bara ekki fest svefn í flugvél og var því orðin verulega sybbin þegar við loks komum heim um 5 leitið í morgun. Auk þess lentum við í flugsætum sem í fyrstu virtust *saga Class* sæti, með miklu rými fyrir framan, en þetta voru þá sæti við neyðarútgang. Það var ekki hægt að leggja þau aftur og ekki heldur hægt að taka stólarmana upp, ekkert hægt að koma sér þægilega fyrir. Eins og það væri ekki nóg, þá fylgdi þessum sætum líka heilmikil ábyrgð: Flugþjónn kom og kenndi okkur í smáatriðum hvernig við ættum að opna neyðarútganginn ef til þess kæmi að það þyrfti!
Alltaf skrítinn fyrsti dagurinn eftir svona ferðalög milli landa, eins og maður detti inní eitthvað tómarúm, heilinn í vagúmpakkningu, kannski er það satt sem einhver sagði, að sálin kæmi alltaf með næstu vél.
Svo nú er að strauja í gegnum dagblaðafjallið, kynna sér hvað er í gangi hér, komin ný ríkisstjórn og svona.......
Mér sýnist mér hafi tekist að lauma einhverjum sólargeislum og hitagráðum með mér í farangrinum. Esjan er allavega ekki hvít!

Tenerife aftur, fleiri skrímsli, Abba-show og útskriftargjöf!!

2007-05-29T11:58:00.001Z

Sólgleraugun
Originally uploaded by sara johanna.

Allt annað líf síðan ég fékk sólgleraugun! Birtan hér er ekki fyrir venjuleg íslensk augu eins og glöggt má sjá á þessari mynd. Ég gafst upp á að leita að passandi gleraugum til að smella á mín, öll voru svona rúnnuð og stór. Ég keypti þessi, fór svo heim og klippti þau til. Hér eru þau fyrir klippingu.

Við flugum til baka til Tenerife í gærkvöldi að afloknu matarboði hjá Jóhanni og Cristinu. Þegar við komum á hótelið mætti okkur kunnugleg vond lykt og hótelgarðurinn var allur blautur. Kakkalakkar lágu eins og hráviður út um allt, á bakinu. Merkilegt hvernig þeir skella sér á bakið á dauðastundinni. Það hafði greinilega verið kallaður til meindýraeyðir. Líklegast einhverjir hótelgestir sýnt harðari viðbrögð en við um daginn. Þegar við svo opnuðum íbúðina stökk á móti okkur skrímsli sem hafði reynt að plata dauðann. Þar misreiknaði það sig, því Gísli tók stökk inná bað, náði í eiturbrúsann og dúndraði á hann örugglega hálfum brúsa og skrímsla-gaurinn endaði á bakinu. Nokkrum mínútum síðar kom í ljós að hann var ekki einn um að hafa sloppið undan meindýraeyðinum, vinur hans var á vappi inná baðherbergi......Hann hlaut sömu örlög og var kominn á bakið stuttu síðar. Brúsinn örugglega alveg að verða tómur, bara á þessa tvo og þetta er enginn smá brúsi. Whiskýið er miklu betra á þennan ófögnuð, það drepur þær á augabragði á meðan þetta gutl með vondu bón-lyktinni fargar þeim hægt og rólega. Smelli mér kannski á nýjan whiský pela, hinn er náttúrulega löngu búinn, -fylgir ekki sögunni hver sá fyrir því...
Gólfið semsagt löðraði allt í klístruðuí skordýraeitri svo nú tók við gólfþvottur á síðkvöldi.
Þetta er nú meira pöddubælið ;)

Til að njóta adrenalínvímunnar eftir átökin, blönduðum við okkur gin&tónic og settumst útá svalir. Þar bárust okkur þessir fínu Abba-tónar og greinilega fjölmennur gleðskapur. Það var rjóma logn og mun hlýrra en verið hefur.
Við ákváðum að drífa okkur út og renna á hljóðið.
Þetta kom frá nærliggjandi hótelgarði og þar plöntuðum við okkur niður, fengum okkur meira gin&tónic og horfðum á Abba showið sem var bara þokkalegt, nema búningarnir voru arfa-ljótir fyrir utan silfurlituðu háu stígvélin á Agnetu og Frídu og útvíðu glimmer-buxurnar á Benny og hvað hann heitir aftur hinn.....Andersen?
Að því loknu tók við maður með skemmtara, þeir virðast vera hér á hverju strái og spila alltaf sama prógrammið aftur og aftur, hver með sitt prógram þó, þessi var með nýrri slagara en sá sem er alltaf hér á okkar hóteli, enda yngra fólk þar.
Hann er dulítið langur í okkur fattarinn, við höfum oft heyrt tónlist og gleðskap þegar við höfum setið útá svölum á síðkvöldum, en föttuðum ekki hvaðan hljóðið barst fyrr en núna, næstsíðasta kvöldið okkar hér. Semsagt hótelið við hliðina á okkur er aðal djammstaðurinn í bænum!

Nú er kominn þriðjudagur og Gísli farinn í sitt golf en ég hugsa mér gott til glóðarinnar með nýja leikfangið mitt sem ég fékk gefins í gær!!!! JESSSSSSS!
Haldiði að ég hafi ekki fengið Sigma 10-20mm linsu í útskriftargjöf frá bóndanum!!!
Jóhann frændi fór með okkur í ljósmyndavörubúð sem hann þekkir í krók og kring í Las Palmas . Það er búið að vara mann svo rækilega við indverjunum sem undantekningalaust reka þessar búðir og eru jafnvel að selja fólki tóma kassa dýrum dómum, eða með einhverju gömlu drasli í fínum umbúðum, fyrirtæki Jóhanns er í föstum viðskiptum við þessa búð (sem selur líka sjónvörp og alls konar raftæki) svo þeir þora ekkert að steypa í honum :)

En nú ætla ég að vinda mér útí næst síðasta Tenerife-daginn minn :)
og sjá hvernig hann spinnur sig.

P.s. eftir að ég skrifaði þessa færslu fór ég að hafa mig til til að fara út og komst þá að því að nýju gleraugun eru ónýt! Ein af nokkrum skrúfum er dottin af og finnst ekki, svo nú hangir annað glerið lóðrétt niður á kinn. Spurning hvort ég nenni nokkuð að redda mér nýjum.....?

Las Palmas, smá gleymska og þjónakoss..........

2007-05-28T02:14:00.001Z

Late afternoon in Canaria
Originally uploaded by sara johanna.

Búin að vera í aldeilis góðu yfirlæti í Las Palmas á Kanarí yfir helgina!
Lóðsuð um af innfæddum fyrsta daginn (þ.e. Jóhanni frænda og Christinu, konu hans, sem er fædd hér og uppalin) Við fengum íbúð uppí hendurnar og bíl Jóhanns til frjálsa afnota! Fórum síðan með þeim og Söru litlu dóttur þeirra á lókal veitingarhús að hætti heimamanna. Á Laugardögum hópast fjölskyldurnar saman í löns á heimilislegum resturöntum og gæða sér á góðum mat. Þarna var ekki einu sinni matseðill, þjónninn kom bara og þuldi upp það sem var í pottunum þennan daginn og þá var eins gott að kunna spænsku....sem þau gerðu ;) Við borðuðum líka með þeim kvöldmat í gamla bæjarhlutanum þar sem er hellingur af skemmtilegum matsölustöðum, og það var ekki kl. sjö.....heldur uppúr kl. tíu um kvöldið sem sú athöfn hófst. Og þvílíkt gúmmolaði sem við fengum......ekkert nema nammi namm.
Í dag fórum við hjónakornin svo í bíltúr hringinn í kring um eyjuna.
Lögðum keik af stað uppúr hádegi vopnuð einhverju míní landakorti sem dugði svo svona skrambi vel. Las Palmas er efst til hægri á kortinu, semsagt norð-austur, og við ókum niður, í suður . Enska ströndin, sem milljónir íslendinga fara á ár hvert, er einmitt á suðurströndinni og að sjálfsögðu stoppuðum við þar til að skoða verksummerki. Það var líka kominn tími á hressingu og við fórum að skima eftir bitastað sem okkur gæti hugnast.
Nema hvað að Gísli fer að haga sér eitthvað undarlega, þessi annars dagsfarsprúði maður byrjar að lemja sig allan að utan, einkum og sérílagi á mjaðmirnar, rassinn og sitthvorumegin við gersemarnar.
Ég er nægilega greind til að sjá að það er eitthvað sem er ekki eins og það á að vera..... Hvað það er kemur í ljós þegar hann segir: Veskið........!!!!
Peningaveskið okkar var semsagt á stofuborðinu í Las Palmas........

Sem betur fer voru nokkrar evrur í ljósmyndatöskunni minni, svo okkur tókst að nurla saman fyrir tveimur kaffibollum á ensku ströndinni áður en við snérum til baka að sækja veskið.
Svo var það bara byrjunarreitur aftur: Hringferð, taka tvö!

Það var EINN geisladiskur í bílnum og við spiluðum hann hring eftir hring.
Þetta var Jóhann Helgason/ Söknuður........og sá er góður!
Ekkki grunaði mig að hann hefði samið öll þessi lög sem hann flytur þarna.
Sjálfur gerir hann þetta svo vel að þótt þau séu mjög vel flutt af öðrum flytjendum, sem hann samdi þau fyrir, toppar hann flutninginn undantekningalaust!

Ferðin upp vesturströndina á Kanarí var mögnuð, snarbrattir og bugðóttir fjallvegir í mögnuðu landslagi. Sólin gerði líka sitt til að auka á dramatíkina, ljós og skuggaspilið var ekki af verri endanum, Komum ekki heim fyrr en um níu leitið í kvöld (stoppuðum oft, oft, oft á leiðinni).

Slepptum svo síðdegisblundinum, enda komið síðkvöld , brugðum okkur í gamla bæjarhlutann, leituðum að góðum matsölustað og kröfluðum okkur fram úr spænskum matseðli, þjónustustúlkan sem var frá Argentínu, forvitnaðist um hvaðan við værum og varð uppnumin þegar það lá ljóst fyrir og sagði full aðdáunar: BJORK! Hún kvaddi okkur með kossi á báðar kinnar og við tókum leigubíl heim eftir langan og góðan hvítasunnudag :)

Á morgun kemur nýr dagur og við vitum ekkert hvernig hann verður, nema að við stefnum að flugi annaðkvöld til baka til Tenerife :)

9 holur, flugferð og magaverkur

2007-05-25T12:29:00.001Z

Golfari við iðju sína
Originally uploaded by sara johanna.

Brá mér á golfvöllinn í bítið í morgun með golfurunum. Ég lét mér nægja að fylgja þeim 9 holur af 18 og tók svo leigubíl heim. Fallegur golfvöllur, það vantar ekki! og veðrið lék við hvurn sinn fingur.
Fyrir utan að forvitnast var mitt hlutverk var að taka af þeim myndir en það gekk ekki alveg nógu vel. Ég er ekki nógu örugg á stillingarnar og óvön að taka myndir í svona mikilli birtu. Náði samt nokkrum þokkalegum held ég. Nú svo kann ég ekkert reglurnar og stóð oft á vitlausum stað, alltaf verið að segja mér að fara hingað eða þangað svo ég fengi ekki bolta í hausinn (sem ég hélt að héti kúla og fékk háðsglósur fyrir) ....Gengur betur næst.
Í fyrramálið (laugardag) ætlum við að fljúga til Las Palmas á Kanarí og heimsækja Jóhann frænda , konu hans Christinu og dótturina Söru. Hlakka mikið til að sjá nöfnu mína Jóhannsdóttur sem fæddist í febrúarbyrjun. Jóhann er búinn að útvega okkur íbúð og bíl og ætlar með okkur út að borða annað kvöld að hætti heimamanna eins og hann orðaði það, semsagt ekkert túristadæmi!
Hann hefur búið þarna í 6 ár og kann vel við sig í þessu loftslagi. Það verður mikið gaman að hitta þau og komast í *eðlilegt* umhverfi :)
Annars er bara allt gott, nema ég fékk svakalegan magaverk í gærkvöldi og hélt að nú væri komið að því, maðurinn með ljáinn stæði á svölunum, kominn til að sækja mig. Ég rótaði í skúffunum eftir neyðarnúmeri farastjóranna og benti Gísla á það *in case* ef maginn myndi springa með hvelli. Verkurinn stóð í svona gott korter en hvarf síðan jafn snöggt og hann kom og engin Sara dó. Skessustingur semsagt ;)
Maga-sagan er eingöngu skrifuð Ylfu frænku til skemmtunar, við frænkurnar erum nefnilega við dauðans dyr a.m.k. einu sinni í viku, og þegar verst lætur oft á dag!
Það er engan veginn hægt að útskýra þetta syndróm fyrir eðlilegu fólki, held að við séum þær einu í heiminum sem eru haldnar því ;)

En nú er það sólin..... ég VERÐ að fara að byrja að sóla mig eitthvað, búin að vera hér í viku og 2 daga og bara búin að fara í sólbað í einn klukkutíma á svölunum! Ég hef ekki eirð í mér til að liggja kjur í sólbaði. Hinsvegar er gaman að svamla í sjónum, kannski ég bregði mér bara niður á strönd!

Sjókokkur á vitlausum stað!

2007-05-24T09:58:00.001Z

sjókokkar
Originally uploaded by sara johanna.

Ég er náttúrulega kolvitlaust staðsett á hnettinum í dag.
Í dag ætti ég með réttu að vera stödd í Digraneskirkju klukkan eitthvað sem ég man ekki, með blóm í barmi og tár á hvarmi að taka á móti prófskírteininu úr kokkaskólanum! Í dag er ég orðin löglegur Sjókokkur! Á skírteininu heitir það líklega Matsveinn, en í daglegu tali kallað sjókokkurinn.
Eftir athöfnina ætti ég svo að mæta í myndatöku með hópnum, en að þessu sinni verð ég ein af þessum: *á myndina vantar.........*

Ég hugsaði bara ekkert út í þetta þegar Tenerife ferðin var pöntuð og keypt.
Vissi reyndar ekki þá að það yrði formleg útskrift með pompi og prakt.....
Fífl gat ég verið!!!! -Þarna missti ég af glás af útskriftargjöfum sem hefðu getað verið sitthvað smálegt þessu tengt. Í fljótu bragði koma í hugann hlutir eins og gaseldavél með sjálfhreinsandi ofni, ísvél, hakkavél, hrærivél, kjarnhitamælir, borðstofusett, laukklukka, frystiskápur, utanlandsferðir með gömlum frænkum, já og kannski Sigma 10-20mm víðlinsa á myndavélina mína!
en nei.....fyrir fljótfærni og flautaþyrilshátt missti ég af þessu öllu :(

Tvennt get ég samt yljað mér við á þessum degi:
númer 1) Það ER til hópmynd af okkur sem útskrifumst í dag, þar sem ekki er neinn sem: *á myndina vantar* Ég tók hana sjálf (myndavélin á þrífæti) rétt áður en við fórum í lokaprófið í verklegri matreiðslu. Við höfðum mjög nauman tíma fyrir myndatöku og vorum öll útúr stressuð þó það sjáist engan veginn á svipnum á okkur, allir með kúlið á sínum stað (svona að mestu leyti ;) - hinsvegar vegna tímaskortsins náði ég ekki að stilla vélina eins vel og ég hefði getað annars ;)
númer 2) ég FÉKK útskriftargjöf áður en ég fór út, alveg gersamlega óvænt: Bryndís systir og Garðar mágur færðu mér æðislega blágræna kertalukt (ylfa, er það nokkuð lugt?) , rauðvínsflösku OG Balayeurs du desert, diskinn með hljómsveitinni sem fylgdi Risessunni um Reykjavík á dögunum! Hann er alveg æði!
Takki takk elskurnar, þið björguðuð deginum!

Í dag, klukkan eitthvað sem ég man ekki, er ég í huganum með skólafélögum mínum í útskriftinni... og bara óska okkur öllum innilega til hamingju með daginn !

Af sólsting, fótbolta og dansi-dansi

2007-05-23T17:48:00.001Z

Sundlaugarbakkinn
Originally uploaded by sara johanna.

Nú hafa borist fréttir af íslenskri konu á golf-hótelinu sem fékk all svakalegan sólsting á dögunum þegar hún gekk eftir ströndinni derhúfulaus á sólarlausum degi! Höfuðið á henni bólgnaði upp svo kalla þurfti til lækni! (ég hefði dáið úr hræðslu) Hún er nú á batavegi. Önnur íslensk kona smellti sér í sólbað fyrsta morguninn og brann svo rækilega að hún hefur haldið sig innandyra síðan. Hún getur ekki verið í fötum vegna brunans! Á kynningarfundinum með fararstjórunum var okkur sagt að fengjum við í magann, væri það nánast alltaf vegna hitans en ekki eitraðra matvæla. Hugsið ykkur bara hvað þið eruð heppin að hafa slydduna og haglélið í Reykjavík en ekki þetta stórhættulega veður hér!
Og þetta borgum við fyrir dýrum dómum, er ekki í lagi með okkur?

Í kvöld er ég grasekkja, bóndinn farinn á breska krá með golfurunum að fylgjast með hvort Ítalir eða Bretar vinni einhvern titil í fótbolta. Þeir taka dæmið snemma, ætla að borða fyrst einhverjar testósteron-piparsteikur og hita sig upp fyrir átökin.
Mér var auðvitað boðið fyrir kurteisissakir en afþakkaði pent, ekki minn tekoppur.

Ég ætla út í búð og kaupa mér eitthvað gott í gogginn og nú er ég búin að finna fína útvarpsstöð með góðri nostalgíu músík frá ýmsum tímabilum, allskonar músík, earth wind& fire, tina turner, piano man (lag), elvis, steely dan, pixies, rem, led zeppelin, cat stevens og name it! Svo fæ ég mér bara romm og kókakóla , stilli í botn og dansa í sandölunum á svölunum...... Það verður gaman hjá mér ;)

p.s. við fengum nýja hótellykla svo nú er allt í orden:) Þetta er allt tölvustýrt núorðið og ekkert mál að breyta skrám....

Allsstaðar eru þessir glæponar!

2007-05-22T13:52:00.001Z

Originally uploaded by sara johanna.

Þetta með sólina í gær reyndist svo bara vera gabb. Hún lét sjá sig í bítið en svo hrönnuðust skýin fyrir hana og héldu sig þar daginn út! Þannig hefur þetta reyndar verið síðan við komum, sól til 10 á morgnanna og svo búið. Þetta lítur betur út í dag, komið fram yfir hádegi og ennþá bara fjórir litlir skýjabólstrar á himni og enginn þeirra í námunda við sólina :) Ég fæ kannski uppreisn æru hjá hinum golf-grasekkjunum eftir þennan dag.....sjö níu þrettán......
Ég frétti að hefði snjóað í Reykjavík í gær! Þá átti náttúrulega að hlakka í mér.....
Það fylgir ekki sögunni hvort það gerðist ;)

En nú er komið smá babb í bátinn: annað hvort okkar er búið að týna hótellyklinum sínum og bóndinn farinn í golf, lyklalaus. Eins gott að þetta uppgötvaðist áður en hann fór í morgun, annars hefði ég ekkert komist inní íbúðina aftur fyrr en síðdegis.
Að sjálfsögðu snérum við öllu á hvolf í íbúðinni og leituðum allsstaðar og mörgum sinnum á hverjum stað en án árangurs.

Og með það sama fór neikvæða hugmyndaflugið mitt í gang, á augabragði sá ég í hendi mér hvað hafði gerst : Á veitingahúsinu í gærkvöldi hafði lykillinn minn skoppað uppúr ljósmyndatöskunni þegar ég var að ná í myndavélina til að afmynda matinn sem var svo flottur, einhver túrhestur með krimminel tilhneigingar sat við nærliggjandi borð og sá þegar lykillinn (sem er rafrænt kort) datt undir borðið. Hann sá líka hvað ég var með gífurlega flotta myndavél og hugsaði með sér að fyrst ég ætti svona grand myndavél, hlyti ég að eiga afbragðs fartölvu uppá hóteli til að setja myndirnar í og jafnvel vinna eitthvað með þær.
Hann beið þangað til við drifum okkur burt, örugglega búinn að borða fjóra eftirrétti til að biðin yrði ekki grunsamleg í augum þjónanna. Síðan náði hann í kortið undir borðinu og elti okkur heim á leið svo lítið bæri á. Hann var með blýant og blað í vasanum og skrifaði niður hjá sér númerið á íbúðinni, ákveðinn í að koma á morgun (í dag) og stjéla tölvunni og myndavélinni!

Síðan ég fattaði þetta er ég búin að vera á báðum áttum hvort ég eigi að þora að yfirgefa íbúðina og skjóta mér út í sundlaugargarð eða hvort ég eigi bara að hanga á svölunum (vonandi er þrjóturinn ekki með byssu). Ég er búin að vera að skima eftir felustöðum í íbúðinni en engan skynsamlegan fundið ennþá. Ekki setur maður tölvuna inní ísskáp!

Eina sem ég get gert í stöðunni er að slaufa sólbaðinu og koma mér útí internet-kompuna innaf ljósmyndavörubúð indverjanna hér ofar í götunni, þangað tek ég nottla með mér tölvuna, já og til öryggis myndavélina.....
Svona getur nú lífið stundum verið flókið þegar maður á dýrgripi :(
Aumingja Dorrit.....segi ég nú bara! Hvað má hún líða?

dagbók frá Tenerife....

2007-05-21T10:14:00.001Z

Mao lúkkið
Originally uploaded by sara johanna.

Laugardagur:
Sem betur fer var engin sól í dag, því ég er ekki ennþá búin að finna á mig sólgleraugu sem passa utanum sjóngleraugun. Nógu er nú bjart samt, þó sólin sé ekki að bæta ofan á það.
Annars keypti ég mér derhúfu í gær til að redda mér fram að sólgleraugum . Ég er ekki flott með derhúfu. Allavega ekki með klassíska kúlulaginu svo ég prófaði annað snið sem er svona öllu ferkantaðra uppá kollinum. Hún er hermanna-græn og í speglinum í búðinni var ég bara nokkuð flott með hana, spegillinn að vísu i minni kantinum og í dimmu skoti. Húfan gerir alveg gæfumuninn, augun ekki eins konstant pýrð og minni hætta á sólsting þegar sólin lætur sjá sig.
Ég var bara nokkuð góð með mig og stóð í þeirri meiningu allan daginn að ég væri voða sæt með nýju húfuna........gott ef ekki bara sætasta stelpan á ballinu....þar til ég kom aftur heim á hótel og mætti risaspeglunum þar, sem spegla alla vínkla...
- Ég var ekki pæjuleg!...leit út eins og Mao formaður, með græna kaskeitið! *Sætt* var langt því frá rétta lýsingarorðið yfir lúkkið. -Eitthvað sem vekur óttablandna virðingu var kannski nær lagi, enda þegar ég hugsa til baka er ég ekki frá því að ég hafi einmitt séð svoleiðis svip á fólkinu sem mætti mér á götu eftir að ég setti upp húfuna ;)

Við brugðum okkur til golf-gengisins í hinum bæjarhlutanum til að snæða með þeim kvöldmat. Þau fóru með okkur á stað rétt hjá hótelinu þeirra. Þar var góður matur og heimilisleg þjónusta og þau búin að prófa alla réttina á matseðlinum sem voru aðallega nautasteikur (ég fékk mér samt pastarétt). Okkur til undrunar kom í ljós að þau voru búin að borða þarna öll kvöldin og ætluðu sér að halda því áfram! Ekkert að vesenast, sögðust alltaf gera þetta erlendis, finna sér matstað nálægt hótelinu og halda sig við hann!!! alveg öfugt við okkur sem erum eins og flær á skinni alltaf á nýjum og nýjum matsölustöðum í leit að nýjum ævintýrum fyrir bragðlaukana.
Þegar við sögðum þeim skrímslasöguna okkar hrópuðu þau umsvifalaust: Látiði færa ykkur strax! T.d. hingað, hér eru engar pöddur. En okkur verður ekki haggað, við ætlum bara að búa áfram á okkar elli-smella-hóteli. Skrímslin eru dauð og við treystum því að þau hafi þegar mætt á miðilsfund hjá eftirlifandi skrímslum og varað þau við viský-morðingjunum ógurlegu.

Sunnudagur:
hm.....engin sól í dag heldur......fjórða daginn í röð........
Spurning hvort ég á að hafa einhverjar áhyggjur af þessu? Ég fór í tveggja vikna sólarferð í fyrrasumar og þá var bara sól í 2 daga, rigning og þrumuveður alla hina, og svo skrapp ég til Svíþjóðar í apríllok hvar hafði verið hitabylgja í mánuð, en þá fjóra daga sem ég var þar, dró fyrir sólu og kólnaði allískyggilega, fór niður í 4 gráður minnir mig, vettlinga og húfu veður en hlýnaði síðan aftur svo um munaði um leið og ég hypjaði mig til baka heim. Er einhver að fikta með vúdú-dúkku á mig og ferðalög? Ég asnaðist til að segja golf-ferðafélögunum þessar ferðasögur mínar og nú eru þau klár á því að sólarleysið hér sé mér að kenna! Þau höfðu séð fyrir sér sólböð á sundlaugarbakkanum í bland við verslunarferðir , golf og kvöldmat á horninu en hafa svo ekki enn getað spókað sig á bikiníunum sínum.

Í dag gengum við eftir endilangri strandgötunni, sem var þriggja tíma ganga ef með eru talin þrjú bjór og hvítvíns stopp. Við sannfærðumst enn betur um hversu heppin við værum með okkar elliheimili og umhverfið þar. Allavega gætum við ekki hugsað okkur að búa á amerísku ströndinni, þar er túrisminn alveg ærandi, kraðakið og sölumennskan verulega ágeng og óyndisleg. Maður gengur ekki þrjú skref áfram án þess að ráðist að manni blakkur sölumaður með sólgleraugu í massavís á öðrum handleggnum en hálsmen á hinum , allir með eins varning. Á víð og dreif sitja svo þrjár blökkukonur í hnapp, mjög fallega klæddar í skærum mynstruðum búningum og bjóðast til að setja perlur og fléttur í hárið á þeim sem það vilja.
(Ég skil ekki alveg afhverju þær eru alltaf þrjár saman.....) Ekki er mikið að gera hjá þeim enda markhópur þeirra, litlar stúlkur, ekki hér í hrönnum í augnablikinu, töluvert of hár meðalaldur á staðnum fyrir þeirra þjónustu. Þær reyna samt.........ótrúlega bjartsýnar!
Ein reyndi t.d. að fá mig í svona aðgerð!!!! Og ég sem var með mao húfuna kyrfilega klessta á kollinum....hún hlýtur að hafa verið nýbyrjuð í bransanum blessunin. Minnug þess að ónefndar ungar frænkur mínar komu grálúsugar heim úr Frakklandsreisu í fyrrasumar hvar þær einmitt keyptu sér svona þjónustu, afþakkaði ég gott boð.

Nú er kominn mánudagur og bóndinn farinn í golf. Sólin er ekki eins feimin og undanfarið því nú sýnist mér vera hálfskýjað. Kannski ég leggist bara á grillið við sundlaugarbakkann. Verst að ég steingleymdi að taka með mér bók að heiman svo ég hef þurft að blogga í staðinn, mér til dægrastyttingar, en varla tek ég tölvuna með út í sundlaugargarð. Aðeins of bjart (og blautt) til þess :)

2007-05-19T12:11:00.001Z

Skrímslin dauð
Originally uploaded by sara johanna.

Við hjónin stóðum í ströngu við eiturefnahernað til kl. 3 í nótt.
Fórum frekar seint út að borða í gærkvöldi og á smá pöbbarölt eftir það.
Komum svo heim um 1 leitið, fengum okkur kvöldhressingu og duttum í smávegis kjaftastuð. Í miðju spjallinu birtist skrímslið, í þetta sinn undan sjónvarpsskenknum og trítlaði um gólfið eins og það væri kóngurinn sjálfur.
Það var búið að vera opið út á svalir í lengri tíma svo ekki var það málið að það slyppi ekki út. Greinilegt var að það var staðráðið í að hafa fasta búsetu í íbúðinni. Hvort það var brjóstbirtunni að þakka eða öðru þá vaknaði þarna drápseðlið í okkur báðum.
Við byrjuðum á að færa til húsgögn því dýrið skaust alltaf allsstaðar á bak við, og á endanum var allt komið á hvolf húsgögn, borð og skápar, út á mitt gólf. Þarna sáum við að dýrið skaust upp veggi og gat gengið á hvolfi undir húsgögnum og komst mikið meira um en við höfðum áður haldið. Við sáum líka að það gat dregið sig saman og skotist undir hurðir á milli herbergja! Það var hrollvekjandi, því bilið þar er eiginlega ekki neitt. Í miðjum eltingaleiknum birtist nýtt skrímsli! Aðeins minna og öðruvísi en sömu ættar...kannski konan eða barnið...? Það var þá sem við skutum á neyðarfundi í sófanum og lögðum á ráðin um almennilegar hernaðaraðgerðir og fórum yfir hvaða morðvopn væru til í kotinu. Þótt ótrúlegt megi virðast (að ég tímdi því) kom hugmyndin frá mér: Við skyldum drekkja þeim í viskýi! Ég spratt upp og náði í óopnaðan fríhafnar-viskýpela , afmeyjaði hann og hellti í glas og upphófst nú eltingaleikur við dýrin bæði, við skvettum á þau til skiptis en í byrjun tókst þeim alltaf að skjóta sér undan. Þegar leið á stríðið fór þeim eitthvað að förlast og litla dýrið varð fyrst fyrir smá gusu og VÁ! það var eins og við manninn mælt, það steinlá með það sama! Stóra skrímslið dó svo skömmu síðar. Semsagt : Viský drepur!
Þegar adrenalínvíman fór að renna af okkur og við fórum að líta í kringum okkur fengum við hláturskast, Íbúðin var gersamlega á hvolfi, viskýpelinn hálfur og viskýpollar um öll gólf og sumstaðar skvettur langt uppá veggi. Sjónvarpsskjárinn snéri uppað vegg (stendur á skenk á hjólum) skúffur voru á víð og dreif um stofuna því kvikindin höfðu skotist um allt, m.a. inní skúffur og skápa Og inní tölvutöskuna mína! Og þvílíkur áfengisfnykur! Við máttum gjöra svo vel og skúra allt hátt og lágt og lofta út. Nú er kominn nýr dagur og pöddurnar ennþá steindauðar á vaskborðinu, en til öryggis helltum við slatta af viskýi á þær eftir að þær voru dauðar, svona til að fyrirbyggja að þetta væri ekki bara áfengisdauði. Ég ætla svo að skjótast með þær niður í lobbý á eftir og sýna hótelstaffinu gripina og spyrja í leiðinni hvað svona pöddur heiti.
Nú er ég búin að fá það staðfest að kvikindin heita Cucarachas og eru hér í milljónatali. Við fengum brúsa af skordýraeitri afhentan með viðhöfn, svo nú getum við brúkað viskýið til annarra hluta ;) Eru þetta kannski ekki bara kakkalakkar?

p.s. Varðandi fyrirsögnina á færslunni á undan, Ylfa, ég veit ekki hvað kom yfir mig að skrifa skrímsli með yppsiloni, það jaðrar nottla við dauðasynd! en það er eitthvað *bögg* á blogger svo ég get ekki breytt því núna :( Reyni aftur síðar, því þetta gengur náttúrulega engan veginn !

Gott veður, skrýmsli og eldri borgarar :)

2007-05-18T12:48:00.001Z

Originally uploaded by sara johanna.

Eitthvað hefur yahoo klikkað á veðurspánni, hér er hvorki dropi af rigningu né þrumugangurinn sem hótað hafði verið. Hér er bara sól og hiti og svo bjart að ég get varla haft augun opin. Fæ mér sólgleraugu á eftir! Reyndar var okkur sagt í gær að hér væru að meðaltali þrír rigningadagar á ári (yahoo hótaði 8 regndögum í röð!!! ;) Nú er Gísli farinn í golf og ég svona að fara að drífa mig út í daginn. Fer bara á eitthvað rand niður í bæ með myndavélina, býst ég við. Annars er það mottó hjá mér þessa dagana að plana ekki neitt, láta bara hvern dag spinna sig eins og honum þykir best.
Það kom fljótlega í ljós að við erum ekki ein í íbúðinni hér, það fylgir gæludýr með.
Gísli er sveitastrákur og þekkir dýrin stór og smá, þekkir t.d. alla fugla með nafni og hvaðeina, en þetta dýr hefur hann aldrei fyrr séð. Okkur grunar þó að þetta sé skordýr (stórhættulegt og í drápshug, vil ég meina). Sem betur fer flýgur það ekki, en það er á stærð við sígarettukveikjara og heldur ófrýnilegt allt saman. Fyrstu nóttina bjó það á baðherberginu svo það var ekkert pissað þá nóttina en í gærkvöldi þegar við komum heim var það búið að flytja sig inní stofuna. Þegar við komum inn gekk það ákveðið í átt að mér (berfættri) og ég verð að viðurkenna að var að því komin að veina en fraus svo bara í staðinn , fraus í hoppum, hoppaði til og frá og dýrið elti mig!!!! þar til ég stappaði svo rækilega niður að það flúði undir sófa. Venjulega er ég ekkert hrædd við skordýr, mýs og annað smálegt, en þetta skrímsli er bara aðeins of mikið fyrir mig. Ég sá það á Gísla að hann var ekkert hrifinn heldur en hann setti upp pókerfeisið um leið og skrímslið var komið undir sófann og sagði bara : .....Hva!
Enginn drápshugur, ekki neitt, ekkert að bjarga frúnni frá bráðu taugaáfalli....bara :Hva!....... dýrið er bara hrætt við þig! Já einmitt! það er svo hrætt við mig að það gengur ákveðnum skrefum að mér með klær og rana, risastórt og eltir mig í hoppunum þar til ég næstum fótbrýt mig í risa stappi.....hm.....
Dýrið er enn undir sófanum örugglega búið að innrétta sér íbúð þar og hefur það garanterað bara næs.
Hér á hótelinu er internettenging....en nei ég get ekki notað fartölvuna mína, internetið er í gegnum sjónvarpið og ég þarf snúru og lyklaborð til að geta notað það. Það er ekki hægt að fá lyklaborð hér. Hver ferðast með lyklaborð með sér?
Kannski finn ég eitthvað netkaffihús, kannski ekki. Á meðan blogga ég bara í TextEdit ;) sendi það svo í loftið þegir færi gefst.
Annars líst mér bara bráðvel á staðinn, fengum okkur þjóðarrétt hérlendra í gærkvöldi, kryddlegna kanínu og rosa góðan kaffidrykk á eftir sem heitir Barraquto. Kanínan var líka bráðgóð. Við komum hingað með vinafólki okkar en búum í alltöðrum bæjarhluta fyrir misskilning. Meiningin var að við værum í göngufæri við þau, þau vildu búa á golfvellinum, eða við hann, en eitthvað misfórst í pöntuninni og þeim var plantað á kolvitlausan golfvöll, svo nú eru það leigubílar sem Gísli situr í lungað af deginum, til og frá golfvelli og svo að hittast á kvöldin þegar við nennum.
Einnig erum við einu íslendingarnir á þessu hóteli, hinir 200 rottuðu sig saman á öðrum hótelum, líka fyrir misskilning, en það er bara flott, hér erum við eins og lítil börn samanborið við aðra gesti hótelsins eru hard-core þýskir eldriborgarar, og þá meina ég eldri borgarar, göngugrindur og græjur ;) Ekki eru samt allir í göngugrind, nokkur hjón dansa hér á barnum á kvöldin við undirleik eins manns með skemmtara sem flytur aðallega Tom Jones og Engilbert hömperdínk slagara á milli þess sem hann spilar foxtrotta, ræla og valsa. Alveg óþægilega svakalegur tónlistargerningur. Heilmikið bíó samt að fylgjast með þessu. Ég sé á auglýsingum að í kvöld verður töframaður að skemmta á barnum og þegar hann hefur lokið sér af verður Risa Bingó!!!! Kannski við bregðum okkur á það, ef við fáum barnapíu fyrir skrímslið.

Farin í bili

2007-05-16T10:51:00.001Z

Originally uploaded by sara johanna.

Tenerife heitir staðurinn og þar er hlýtt í veðri, mátulega hlýtt fyrir mig, svona í kringum 25 stig held ég. Ég kíkti inná Yahoo veðurspána og fékk ekki fagrar veðurlýsingar þar fyrir utan hitann sem er fínn, Þar er spáð þrumuveðri með tilheyrandi eldingum og regni alla fyrstu vikuna! Spáin náði ekki inní viku númer tvö.... Er ég að breytast í óveðurskráku ? því akkúrat svona veður var í utanlandsferðinni minni í ágúst í fyrra! Ég bara trúi þessu ekki, örugglega bara prentvilla....

Risa helgi

2007-05-13T13:37:00.001Z

Risessan fær sleikjó
Originally uploaded by sara johanna.

Það er búið að vera vitlaust að gera undanfarið, Listaháskóla útskriftarsýningin opnaði í gær og ég og aðrar mötuneytiskonur þaðan sjáum um kaffisöluna. Skemmtileg sýning sem ég mæli með, staðsett í Ártúnsbrekkunni í gömlu kartöflugeymslunum. Mjög skemmtileg bygging og svæðið í kring eins og maður sé staddur út í miðri sveit. Meira að segja Lóa á hlaðinu önnum kafin í hreiðurgerð.
Mikið er ánægð með að hafa gefið mér tíma til að hitta Risessuna niðrí bæ á föstudagseftirmiðdaginn. Það var stórkostleg upplifun og gleðibrosið var áfast á mér í sólarhring á eftir og er eiginlega enn ef grannt er skoðað. Þvílíkt konfekt sem götuleikhúsið franska var fyrir öll skilningarvit og ekki síst hjartað! Langt síðan ég hef fundið fyrir svona fölskvalausri gleði frá toppi til táar, konstant hamingjukasti!
Takk,takk,takk, Listahátíð, fyrir að fá þessa snillinga hingað!

Ég er köttur

2007-05-09T16:55:00.001Z

Originally uploaded by sara johanna.

Persónulega er ég orðin alveg ónæm fyrir pólitísku þrasi frambjóðenda af öllum stærðum og gerðum.
Og nú er ég búin að renna þessu í gegnum greiningardeildina í heilabúi mínu og átta mig á hvað gerist í mér þegar ég verð vitni að pólitískri umræðu. Í stuttu máli er niðurstaðan þessi: Ég heyri ekki HVAÐ þeir segja heldur bara HVERNIG þeir segja það.

Oftast heyri ég eftirfarandi blæbrigði þegar t.d. kappræður eiga sér stað í sjónvarpi eða útvarpi: þras, gremju, suð, tuð, ásökunartón, fórnalambstón, væl, háð, frammíköll, frekju, dónaskap o.s.frv....semsagt mjög niðurdrepandi og óyndislegt.

Ég vildi óska að umræðan væri ferskari, glaðlegri, bjartsýnislegri, uppbyggilegri, umburðalyndari, mannúðlegri, elskulegri og þar fram eftir götunum.

Ég er eins og kötturinn, hraða mér burt og loka eyrunum ef umhverfið er órólegt og rifrildiskennt en slaka á, legg við hlustir og mala þegar umhverfið er friðsælt og vinsamlegt.
Svei mér þá, ég veit ekkert hvað ég á að kjósa á laugardaginn, veit ekki hvernig ég á að afla mér upplýsinga um framboðin þegar ég nenni ekki að horfa á sjónvarp, hlusta á útvarp, né lesa blöðin........

Jedúdamía!

2007-05-08T14:22:00.001Z

Originally uploaded by sara johanna.

Litli salsaprinsinn kom í heimin laust fyrir kl. 5 í morgun. Ylfa, stóra systir náði að vera viðstödd fæðinguna og tók þessa fyrstu mynd af sveinbarninu. Hún kom ekki heim fyrr en snemma í morgun og fékk sér langþráðan blund. Þegar ég svo vaknaði seint og um síðir eftir slitrótta spennunótt var ég svo bráðlát að ég laumaðist ofan í veskið hennar , hnuplaði myndavélinni og hlóð myndunum inní tölvuna mína. Ylfa bloggaði um atburðinn áður en hún fór að sofa , linkur hér til hliðar. Ég bætti svo myndinni inná það síðar.
Innilegar hamingjuóskir til foreldra og systra og velkominn í heiminn ungi piltur!

2007-05-07T10:13:00.001Z

Allt komið á fullt!

Originally uploaded by sara johanna.

Mágkona mín er komin á fæðingardeildina og Ylfa Mist bróðurdóttir mín keyrir í loftköstum frá Bolungarvík til að vera viðstödd fæðinguna.
Hún er semsagt að eignast bróður, 33 ára gömul stúlkan!
Og nú ganga sms-skeytin á milli : 15 mínútur á milli hríða, vatnið farið o.s.frv. Ylfa ætlar að reyna að komast þetta á 5-6 tímum.
Mikil spenna og tilhlökkun ríkir í fjölskyldunni gjörvallri.
Þessi mynd var tekin þegar Tamila var aðeins komin 18 vikur á leið, þið getið rétt ímyndað ykkur hvernig kviðurinn lítur út núna!

Vetur að baki , guði sé lof!

2007-05-06T16:35:00.001Z

Originally uploaded by sara johanna.

Ekki get ég sagt að ég komi mjög spræk undan þessum vetri.
Það er engu líkara en ég hafi orðið undir valtara, bæði í andlegum og líkamlegum skilningi. Þetta var aðeins of mikil törn, vinna/skóli/vinnustofa ásamt óvæntum samskiptaerfiðleikum á köflum.
Síðasti vinnudagurinn var á föstudag og ég hef nánast sofið alla helgina ;)
Skólinn er líka að baki og ég orðin Sjókokkur eða Matsveinn, nema hvorttveggja sé. Langþráð *sumarfrí* er að hefjast, þar sem ég get verið á vinnustofunni daginn út og daginn inn. Mikið lifandis skelfingar ósköp er það góð tilfinning!
Ég býst við að ég fari að rifja upp gamla bloggtakta þegar ég hef safnað mér betur saman, sem ég á von á að verði fljótlega:)
Það er náttúrulega engin umferð á síðuna mína núna enda bloggaði ég síðast í DESEMBER 2006!!!
- annars allt með kyrrum kjörum,
kveðja, sara..........

Gleðilega Hátíð!

2006-12-30T15:00:00.000Z

painting the ceiling
Originally uploaded by sara johanna.

Já ég veit að ég hef ekki verið ötull bloggari í haust og vetur ;)
Ætla nú ekki að þreyta ykkur með afsökunarlangloku en í stuttu máli verið hlaðin störfum og námi og orðið að forgangsraða...það gerðist bara sjálfvirkt og þurfti enga ákvörðunartöku.
Ég kann vel við að hafa lífið í mörgum litum og fjölbreytt, þoli illa áralangar hefðir nema sé eitthvað um kræsilegar breytingar inná milli.
Þannig er ég nú komin á fullt á nýjum vettvangi, auk myndlistariðkunninnar vinn ég í mötuneyti á morgnanna og er í kokkanámi á kvöldin.
Viku fyrir jól kom upp ný staða á heimilinu, nýir íbúar ákváðu að hreiðra um sig í kjallaranum. Dóttir bóndans og hennar kærasti. Nú var allt sett í týpíska íslenska gírinn, allt skyldi gerast helst strax í gær.
Hirðsmiðurinn Gummi var kallaður til , keypt var eldhusinnrétting og búin til íbúð í kjallaranum einn tveir og þrír :)))))
Jólaundirbúningurinn raskaðist ögn og allt kapp var lagt á að klára dæmið og húsið fór á hvolf.
Þetta hafðist allt og hjónaleysin fluttu inn í gær.
Þetta vissi enginn rúmri viku fyrir jól.
Nú og svo tóku við jólaboðin, skötuveislan árlega, og stórt fjölskyldujólaboð á annann og nú er verið að undirbúa 17 manna matarveislu á gamlárskvöld.
Svo í mínum ranni er líf og fjör og það líkar mér.
Óska ykkur öllum (kannski bara 3-4 sem enn kíkja á bloggið mitt sökum leti minnar;) áframhaldandi gleðilegra jóla og farsældar á komandi ári. Það flysjaðist nokkuð verulega úr jólakortasendingunum vegna annríkis og vona ég að mér verði fyrirgefið það.

sko mína!

2006-09-26T17:27:00.000Z

In the newspaper today
Originally uploaded by sara johanna.

Smá gort......
Ljósmynd eftir mig í Fréttablaðinu í dag.
Allir að lesa og skoða. ;)

Sprækur hann pápi!

2006-09-14T19:00:00.001Z

Villi Valli
Originally uploaded by sara johanna.

Gaman að segja frá því að nú standa yfir upptökur á öðrum geisladiski föður míns. Stúdíóið ekki af verri endanum, gömul sundlaug upp í mosó, stúdíó þeirra Sigur Rósar-manna.
Ég skundaði á staðinn og skaut fáeinar myndir. Hef hlaðið nokkrum inn á myndabloggið mitt :
Hérna!
Vonandi verður diskurinn tilbúinn fyrir jól, læt ykkur vita um framvinduna.....
Annars er bara vitlaust að gera hjá mér þessa dagana og lítill tími til tölvusetu.
Vona að mér sé fyrirgefin bloggletin.......

Þriðjudagur til þrautar.....

2006-09-06T17:17:00.000Z

Sky today
Originally uploaded by sara johanna.

Ég er orðin svo kvöldsvæf síðan ég byrjaði að vinna snemma og menntast seint að ég hafði ekki séð einn rockstar þátt fyrr en í nótt.
Og þá var sko komin nótt hjá mér! Ég hélt augunum opnum á þrjóskunni einni saman til kl. rúmlega tvö, ákvað að kjósa fyrst ég var vakandi, kaus 5 sinnum en var þá svo heppin að sýstemið fraus, hvort sem það var tölvan mín eða sjálf síðan veit ég ekki, svo ég lokaði tölvunni og augunum nokkrum mínútum síðar, dauðfegin að komast í draumalandið. Mikið rosalega er leiðinlegt að fá allt þetta auglýsingaflóð yfir sig! tvö lög- 30 auglýsingar, 2 næstu lög - 40 auglýsingar.......nei, nenni þessu ekki. Ég á ekki vídéó sem væri það eina rétta í þessu dæmi, taka upp þáttinn og hraðspóla yfir auglýsingarnar. Hafi verið einhver spenna í þessum þ´tti, datt hún niður dauð í auglýsingahléunum.
Not my cop of tea. og þessir þrír gaurar í dómnefndinni!!! say no more.
4 og hálfur tími í svefn er OF lítið fyrir mig.
Til að snúa sólarhringnum ekki við, er ég búin að pína mig til að sofna ekki í dag, og hef þarafleiðandi verið eins og svefngengill.....á hálfu gasi.
Það er jafn gaman í skólanum og síðast og örverufræðin meira spennandi en ég hélt, enda mjög fínn kennari sem kemur fræðunum frá sér á lifandi og myndrænan hátt. Talar um örverurnar eins og um fjölbreytta og litríka karaktera sé að ræða, verð að berja saman smá örverupistil fyrir ykkur innan tíðar. Konan sem kennir okkur er Líffræðingur og nú er ég að byrja að skilja afhverju einstaka fólki dettur í hug að læra þetta fag og gera að sínu lífsstarfi að miðla upplýsingunum! Kannski ég fari bara í líffræði þegar ég er búin með kokkinn og ljósmyndarann ;)

Long time - no blogg!

2006-09-02T17:22:00.000Z

Never too late......
Originally uploaded by sara johanna.

Það er búið að ganga svo mikið á í mínu litla lífi að ég hef ekki gefið mér tíma til dagbókarskrifa, nema á myndablogginu mínu á Flickr.
Ég er byrjuð að vinna í eldhúsinu í Listaháskólanum á morgnanna, er á vinnustofunni um miðbik daganna og fer svo í menntó á kvöldin!
Er semsagt að taka matsveininn, sjókokkinn, eða hvað það er kallað.
Þetta er eins árs nám og þarna er manni uppálagt að mæta á svæðið í alvöru kokkabúningi! Mjög skondið, hélt þetta væri spaug í kennaranum, en nei, bláköld alvara var það.
Auk þess þurfum við nemarnir að fjárfesta í alvöru hnífum af bestu sort, skurðarhnífum, grænmetishníf, úrbeiningahníf, fiskskurðarhníf, brauðhníf og stáli til að halda bitinu við í þeim.
Fyrstu dagarnir hafa að mestu farið í að kynna okkur fyrir milljón trilljón örverum og bakteríum sem eru að spássera í borðtuskum, á eldhúsborðum og víðar, svo nú bregður svo við að ég er með handþvott og þrif á heilanum og er eiginlega orðin tuskuóð.....ja hérna, öðru vísi mér áður brá.
Annars bar það til tíðinda í byrjun ágústmánaðar að ég varð hálfrar aldar gömul og stakk af í tilefni af því, brá mér ásamt ektamakanum til Ítalíu, Slóveníu og Króatíu. Þetta var hin hressilegasta tveggja vikna ferð, sirka þrír sólardagar, hina dagana voru þrumur og eldingar, með þvílíkri rigningu að það var bara fyndið. Bráðskemmtileg ferð, þrátt fyrir eða kannski vegna þessa.
Ég á varla von á að nokkur lesi þennan pistil, þar sem ég hef ekki skrifað svo lengi, allir örugglega hættir að kíkja við.
svo ég hef þetta ekki lengra að sinni.

Sól Sól skín á mig....

2006-07-20T14:44:00.000Z

Perfect day...for sunbathing!
Originally uploaded by sara johanna.

Þegar ég heyrði hverja tilkynninguna eftir annarri um að fyrirtækjum væri lokað í dag vegna veðurs, ákvað ég að loka minni pappamassa-fabrikku ehf og gefa mér frí frá pappírsvinnunni en flatmaga þess í stað í garðinum mínum.

Og nú nokkrum tímum síðar, er ég flúin inní hús í svalann. Var komin að því að stikna og farin að renna til í svitapollinum eftir mig.

Svona er maður nú mikill kjúklingur ;)

Pappafólk að fæðast.......

2006-07-19T10:08:00.000Z

still in process
Originally uploaded by sara johanna.

Ég er búin að vera temmilega upptekin síðan ég leigði mér vinnustofuna á Seljaveginum. Allt annað líf að fara svona langt í vinnuna, maður fer átómatískt í vinnugírinn og hefur ekkert til að láta glepjast af, því þarna eru bara græjurnar sem ég nota við myndsköpunina, ekkert hversdagslegt vesen sem fylgir heimili.

Við fengum gest frá Skotlandi í þriggja vikna heimsókn í júní/júlí , Konu sem ég kynntist í gegnum Flickr- ljósmyndabloggið á netinu semsagt. Þetta voru stórfínar þrjár vikur, við ákváðum í sameiningu, ég og gesturinn að hafa þetta eins *kasúal* og hægt væri, engin gestalæti og vesen. Hún kom með mér í vinnuna á vinnustofunni og vann þar sín verk á meðan ég vann mín.

Við vorum boðnar í nokkrar afmælisveislur (meirihluti fjölskyldu minnar og vina á afmæli að sumri, flestir í júní/júlí)
Heimsóttum fólk, fórum í göngutúra og á þvæling í miðbænum, sem hún heillaðist sérstaklega að.
Vegna komu hennar, sósilíseraði ég meira en ég hef gert í mörg ár, en það er nokkuð sem er stórhættulegt að láta detta út úr prógramminu hjá sér.

Við skruppum til Ísafjarðar í 3 daga, fengum þar lánað heilt hús, gamalt, lítið og fallegt, og lifðum í vellistingum í mat hjá mömmu og Ylfu frænku til skiptis.
Síðasta daginn hennar hér bauð svo Gísli okkur í gullna þríhyrninginn, Geysi Gullfoss og Þingvelli.

Hún heillaðist þvílíkt að landi og þjóð, að nú vill hún ólm flytja hingað. Hún keypti sér lingafón og er byrjuð að læra íslensku meira að segja. Hér fannst henni orkan flæða, allt svo litríkt, börnin svo frjáls, lífið svo litríkt svo eitthvað sé nefnt.
Ég gæti skrifað heila ritgerð um niðurstöður hennar og samanburð á okkar borg og hennar ef því væri að skipta.......og geri það kannski bara fljótlega, er of tímabundin í þessu augnabliki.

setningin : og svo erum við alltaf að væla! var daglegur gestur í huga mínum þessar þrjár vikur.

stoppa hér að sinni.......
p.s. það er myndasyrpa af veru hennar hér á flickr-síðunni minni undir nafninu LisaMac on visit.......

Skjótt skipast veður.........

2006-06-14T01:12:00.000Z

working on.......(2)
Originally uploaded by sara johanna.

Í gær kom í ljós að á vetri komanda þarf ég að skipta mér í þrennt.
ég verð menntaskólanemi, aðstoðarkokkur og myndlistarkona.
Þetta hafði ég ekki hugmynd um í fyrradag!
Ég innritaði mig í matsveinanám (sjókokkinn) í Menntaskóla Kópavogs , og í miðri innritun, hringdi gemsinn minn með atvinnutilboð : aðstoðarkokkur í Listaháskólanum í Laugarnesi.
Ég er nýbúin að fá þessa fínu vinnustofu á Seljavegi og verð að reyna að nýta hana eitthvað meðfram náminu og vinnunni.

Hæstánægð með þessar nýju fréttir, fór ég svo að passa frænkur mínar í gærkvöldi, þar sem foreldrar þeirra fóru á Roger Waters tónleikana í Egilshöll. Eitthvað hlýt ég að hafa verið nett-manísk, því á einhverjum tímapunkti, greip ég tusku og fleiri hreingerningartól og vissi ekki af fyrr en ég var búin að standa í stórþrifum á íbúð systur minnar og mágs í ÞRJÁ og hálfan tíma!!!! Nokkuð sem ég geri ekki ótilneydd.....Og ekki var ég beðin um að gera nokkurn skapaðan hlut sem tengist þrifum.

Þetta byrjaði á sakleysislegu uppvaski, en vatt síðan uppá sig og ég áttaði mig eiginlega ekki á í hvaða ham ég var fyrr en önnur litla frænkan sagði í forundran : Sara, afhverju ertu svona rauð í framan?
Eftir hamaganginn horfði ég á Babettes Gjestebud þangað til ég fór heim um hálf tvö og sofnaði eins og engill í allri endorfín vímunni ;)

Mikið rosalega er GOTT þegar orkan í manni fer á svona flug.
ég byði samt ekki í að vera svona á hverjum degi.

Nú er það svart :

2006-05-29T18:00:00.000Z

street
Originally uploaded by sara johanna.

Íhaldið og framsókn búið að rotta sig saman um borgina.
Ekki fallegt það! Ég var í Köben á kosningadaginn að borða krókódíl og kengúru á áströlskum veitingastað. Alveg svakalega ljúfengtt kjöt get ég sagt ykkur, krókódíllinn er hvítt kjöt (sviðað og kjúklingur) ég var dulítið hissa á því. Kengúran er hinsvegar dökkt kjöt. Ég hefði haldið að þetta væri öfugt.

Við fórum í þessa helgarferð með frænda mínum og konu hans og lentum í spaugilegu klúðri við mikla leit að ákveðnu grilli sem frændi minn ætlaði að kaupa þarna í leiðinni. Við hringdum í búðir og áttum mjög erfitt með að taka við upplýsingunum, skildum illa dönskuna og erfitt að ná niður götuheiti í gegn um síma. Við skiptumst á að hlusta á danann og fengum jafnmörg götuheiti og nafn á búðinni og við vorum mörg. Ekkert okkar heyrði þetta eins.

Við komum okkur svo saman um eina útgáfuna og lögðum í hann. Þetta var töluverð vegalengd, svo það endaði með að við fengum okkur leigubíl.
Búðin fannst að lokum, en þá kom í ljós að þetta grill var ekkert til þar. Það hafði þá líka misskilist! Daginn eftir var farið í annan grill-leiðangur en það klúðraðist líka því eftir að herrarnir höfðu gengið sig upp að hnjám kom í ljós að þetta var skrifstofuhúsnæði einhverrar sölukeðju, búðin var á Jótlandi! Það hafði semsagt ekki skilað sér í símtalinu ;)
Ég held að ég sé á einhverju klúður-tímabili í lífi mínu! Ég nenni samt ekki að pirra mig yfir því. Þetta gengur örugglega yfir einn daginn.

Við ætluðum líka að bregða okkur á skemmtilegt veitingahús sem heitir Loftkastalinn og leituðum að honum út um allar trissur, höfðum farið á hann fyrir tveimur árum en fundum nú hvergi. Þetta var í stórri skemmu, þarna var hlaðborð sem maður mokaði af og síðan var diskurinn vigtaður og rukkað eftir vigtinni. Þetta var á hafnarbakka, en þar hafði verið sturtað niður hvítum sandi og komið fyrir hvítum leðursófasettum utandyra.
Komumst að lokum að því að honum hafði verið lokað fyrir einu ári og húsið rifið! ekki furða að við fundum það ekki.

Við bættum okkur upp allar fýluferðirnar með því að fara á góðan blús klúbb, Mojo, þar var alveg klassa band að spila og fyndið líka þar sem bassaleikarinn var með mjög dularfullan kæk, andaði eins og gullfiskur...en spilaði eins og engill.

Jamm, svona var nú það.

Smá Langloka

2006-05-24T02:38:00.000Z

Originally uploaded by sara johanna.

Nú er loksins að lifna yfir öllu lífi með tilkomu vorsins og blómanna. Maður er farinn að skjótast svona smávegis út fyrir bæjarmörkin og á döfinni er helgarferð til Köben á næstu helgi. Allir eru að kvarta yfir meintu kuldakasti en ég er svo heppin að vera í nánast konstant gufubaði inní mér, svitaköstum á færibandi (þökk sé aldrinum) svo kuldinn er ekkert að bögga mig.

Í ofanálag get ég yljað mér við minningar frá nokkurra daga sumarbústaðarferð með Ylfu frænku í síðustu viku.
Þetta var eftirminnilegasta og örugglega skemmtilegasta slík ferð sem ég hef farið í.

Í stuttu máli, klikkaði allt sem klikkað gat í bústaðnum og það fór svoleiðis yfir strikið að það var ekki hægt að pirra sig á því, við eiginlega kútveltumst bara af hlátri og vorum með harðsperrur í þindinni við heimkomu.

Þarna var heitur pottur, gufubað, kamína og gasofn til að hita kofann með á síðkvöldum. Það kom fljótlega í ljós að heiti potturinn míglak (rafmagnshitaður) svo við þurftum að finna út úr því hvernig við gætum fyllt hann, fundum loks slöngu, sem eftir nokkra leit kom í ljós að við þurftum að skrúfa á sturtuna. Barkinn var lélegur svo vatnið sprautaðist í allar áttir og að því er virtist úr öllum áttum líka !
Ok, Ylfa tók að sér að brasa við að fylla pottinn á meðan ég reyndi að koma skikki á hluti innandyra. Áður hafði hún kveikt upp í kamínunni eftir að hafa gefist upp á gasofninum (kom í ljós að kúturinn var tómur)

Ég var búin að vafra innandyra dágóða stund þegar mig fer skyndilega að logsvíða í augun og um sipað leiti átta ég mig á að lyktin er eitthvað dularfull.
Mér datt fyrst í hug að kamínan væri stífluð og rauk út og kallaði á Ylfu sem var búin að gefa þá yfirlýsingu að hún kynni sko á kamínur.
Þegar við komum inn áttaði ég mig á að ég hafði verið orðin samdauna þessu því bústaðurinn var smekkfullur af eiturgufum og lyktin var skuggaleg.
Í ljós kom að hún hafði óvart lagt plast-gaskveikjara á kamínuna sem var nú að bráðna þar. Með fiskispaða tókst okkur að skutla restinni af kveikjaranum af og svo hlupum við út því þarna var ekki hægt að anda. Létum lofta í gegn í góða stund áður en hægt var að fara inn aftur. Það var þarna, sem við áttuðum okkur á að reykskynjarinn var batteríislaus!

Til að gera langa sögu styttri tók heita pottinn sólarhring að hitna og þá var komið vel yfir miðnætti og nánast myrkur á degi tvö-þrjú. Og við skutluðum okkur útí.
oh það var svo frábært, allt komið í lag, heitt vatn, nuddpottur og næs og sátum þarna og möluðum í svona hálftíma þegar alltí einu slökkna öll ljós og nuddið snarstoppar ! : Stofnöryggið sprakk ! og þetta var öryggi með gamla laginu sem þarf að skipta út, en nei það var ekkert vara- öryggi ! Nú voru bæði potturinn og gufan (sauna) úr leik sem eftir var og sturtan eins og gatasigti, heit buna hér og köld þar svo það var ekki hægt að nota hana nema með mikilli þolinmæði og útsjónasemi .

Grillið var svo útbýjað í drasli að við nenntum ekki að þrífa það til að geta grillað svo við elduðum bara uppá gamla móðinn, kótilettur í raspi og kjötsúpu.
Loftnetið var brotið af útvarpinu svo ekki náðist einu sinni gamla gufan úr því en það var geislaspilari í því og einn geisladiskur sem hlustandi var á, evoria frá Grænhöfðaeyjum og við hlustuðum á hana aftur og aftur (Groundhog Day)

Það var eitt tæki þarna í lagi, sjónvarpið svo við gátum horft á undankeppnina í júróvisjón, en þá tók silvía upp á að klikka - í eina tækinu sem var óklikkað á svæðinu.

Til að kóróna allt saman var þarna draugagangur, en við fundum fljótlega að húsdraugurinn var af mildari gerðinni svo honum tókst ekkert að hræða okkur að ráði. Þetta lýsti sér í fótataki á pallinum úti, og brunalykt sem gaus upp við vaskinn þegar ekkert var verið að elda né nokkuð slíkt, lykt eins og af brennandi timbri.
Hún hvarf jafn snöggt og hún kom.

Gísli minn vill meina að við séum svo mikil borgarbörn að meintur draugagangur hafi bara verið fuglar og ýmis hljóð í náttúrinni en það er auðvitað mesta bull. Ef það er dýr sem framkallaði þessi hljóð, þá er það Elgur !

Ég veit að það hljómar undarlega, en við skemmtum okkur mjög vel þarna, kjöftuðum frá okkur allt vit og hlógum meira en við höfum gert lengi - enda hvað var annað hægt að gera í stöðunni?

Blogg-lömun

2006-05-10T16:21:00.000Z

silver shoes
Originally uploaded by sara johanna.

ég held svei mér að ég játi mig hálf, jafnvel þrjá fjórðu blogg-dauða í bili.
Hinsvegar dæli ég inn myndum á myndabloggið Flickr og gef hér link á það:

MYNDABLOGG

Velkomin í heimsókn þangað !
Nýjar myndir daglega :)

Eina ferðina enn....

2006-04-12T10:49:00.000Z

Ylfa singing in a soya sauce bottle
Originally uploaded by sara johanna.

varð frænka mín fyrir myndavélinni minni. Hún er búin að gista hjá mér undanfarna daga ásamt fjölskyldu sinni svo það hefur verið líflegt í kotinu. Yngsti-mann er tveggja ára og mikill skriffinnur og teiknari. Hann komst óséður yfir dökkbláan olíukrítarlit og var snöggur að myndskreyta parketið í betri stofu gömlu frænku. Hann lét ekki þar við sitja heldur gerði nokkur veggjarkrot til mótvægis. Hann hefur greinilega tilfinningu fyrir litafræði og áttar sig á að liturinn verður að endurtaka sig hér og þar til að fá samhljóm. Hann vann verkið óáreittur á meðan móðir hans söng júróvisjónlagið * Andvaka* í soya sósu flösku, með miklum tilþrifum í eldhúsinu. Faðir hans var önnum kafinn við að taka vídeómynd af konu sinni og sjálf var ég að taka ljósmynd af söngkonunni.
Litlir pattar vita upp á hár hvenær best er að fá almennilegan vinnufrið ;)

Sýningin nálgast !

2006-03-29T10:59:00.000Z

Originally uploaded by sara johanna.

Það er eins og fyrri daginn, þegar ég er að leggja lokahönd á verk sem fara eiga á sýningu, finnst mér þau alltí einu alveg ómöguleg og skil ekkert hvað ég er að gera með að fara að sýna þau ! Þetta er kunnugleg upplifun og ég er ekki ein um hana, þetta fylgir þessu djobbi víst hvort sem manni líkar betur eða verr. Ég ætla ekki að hafa neina formlega opnun heldur byrja ég bara að koma sýningunni fyrir á morgun, fimmtudag og gef mér svona tvo daga í það. Síðan verða verkin þarna svona fram í júní - og þið haldið með mér.....og komið og kíkið á þetta :) Myndin sem fylgir er af hægra auga Ylfu frænku, hún er svo ófeimin við myndavélina mína að ég get tekið myndir af henni eins og mig listir, sem er mjög fínt því hún er mjög fótógenísk .
Það er ekki komplexunum fyrir að fara hjá henni, tökum hana til fyrirmyndar !

NÝTT BLOGG !

2006-03-22T11:44:00.000Z

Originally uploaded by sara johanna.

Best að gefa Ylfu sætu smá breik og birta nýja mynd :) Þessi mynd er af einu verkanna sem ég mun koma fyrir í Grensáskirkju í næstu viku. Þar ætla ég að sýna dulítinn slatta af myndum, málverk, skúlptúra og bland af því tvennu. Það verður engin formleg opnun, en stefnt er að því að sýningin verði komin upp 1.apríl og mun hún standa fram í júní hugsanlega. Þarna er opið alla daga, þetta er rýmið í holinu áður en farið er inní sjálft kirkjuskipið. Þið eruð öll hjartanlega velkomin !
Annars hefur þetta verið erfið vika, undanfarið, Viðar minn var að missa pabba sinn. Jarðarför á morgun í Kópavogskirkju kl.3
Hef þetta ekki lengra að sinni,
kveðja, Sara....

Fór hamförum á myndavélinni

2006-03-07T18:34:00.000Z

Originally uploaded by sara johanna.

þegar aumingja Ylfa kom í kaffi í gærmorgun. Hún var bara eitthvað svo geislandi og fótógenísk að ég gat ekki stillt mig, enda ekki á hverjum degi sem ég hitti konuna. Hún tók þessu sem betur fer með sinni alkunnu stóísku ró og lét sig bara hafa það.
Þegar hún var farin læddist ég í photoshop og bjó til mosaik mynd úr öllu saman. Í morgun leit hún aðeins við og þá með vinkonu sína með sér, þá tók ég þessar myndir:
http://www.flickr.com/photos/saravilbergs/109264163/
semsagt : getur verið hættulegt að heimsækja mig, sé maður feiminn við myndatökur ;)

Svo bregðast krosstré sem...

2006-03-06T18:42:00.000Z

Originally uploaded by sara johanna.

önnur ! Þarna kom ég sjálfri mér á óvart ! Hélt ég ætti þetta ekki til, að lofa svona uppí ermina á mér ;) en svona er þetta nú samt, svikulli en mig grunaði. Það er bara allt búið að vera á haus hjá mér í gær og í dag. Í gær var ég svo önnum kafin að ég gleymdi nánast stað og stund, og í dag var bara gestagangur a´la gamla daga ! Mjög ánægjulegt og ég fór mörg ár aftur í tímann í huganum, alla leið til Ísafjarðar í gamla daga , þegar fólk droppaði inn og út hvert hjá öðru og allt var á hreyfingu og stundum líkara járnbrautarstöð en persónuvernduðum einkalífs heimilis kassa :)
Skemmtilega frænka mín Ylfa Mist (húsmóðir gegn kerfinu með búsetu í Bolungarvík) sendi mér sms snemma í morgun og spurði hvort það væri heitt á könnunni, og svo birtist hún hálftíma síðar og við kjöftuðum frá okkur allt vit, klukkustundum saman og drukkum bæði expresso, kaffe Latte og venjulega lapið. Gísli kom svo óvænt heim í mat, og eftir mat hringdi Elín Björk og boðaði komu sína. Þetta var alveg frábært og ég bara frestaði því sem ég hafði ætlað að gera (náði því samt síðdegis) og naut þess að hafa það huggulegt með skemmtilegum gestum. Þetta er orðið æ sjaldgæfara að maður fái svona óvænta dropp-gesti, við erum að verða eins og hverjir aðrir útlendingar og þurfum helst að láta vita með góðum fyrirvara um allar heimsóknir, einhver sagði mér í gær að í Ástralíu þyrftu börn (uppkomin) að tilkynna með sólarhringsfyrirvara um væntanlega heimsókn til foreldra !!!
Vonandi er langt í þá reglu hér ;)
Nú ætla ég að skella mér í eldamennskuna, kveð að sinni.......

Ég lofa að ......

2006-03-04T23:47:00.000Z

pool
Originally uploaded by sara johanna.

blogga feitt á morgun ;) aðeins að skreppa á billann fyrst :)))))) Góða nótt !

Snorri skírður !

2006-02-23T11:58:00.000Z

Originally uploaded by sara johanna.

Nánar um það í pistlinum fyrir neðan.
Eitthvað ólag á Mr.Blogger í augnablikinu svo ég kom ekki myndinni fyrir með sjálfum pistlinum.

Tíminn Flýgur aðeins of...

2006-02-23T11:29:00.000Z

Originally uploaded by sara johanna.

hratt þessa dagana, komin vika síðan ég bloggaði hér síðast ! Fannst það vera í fyrradag !
Síðan síðast, er ég orðin Guðmóðir, Snorri Daníelsson og sonur Elínar Bjarkar var skírður s.l. laugardag og mér gerður sá heiður að vera beðin um að vera annar tveggja skírnarvotta. Guðforeldrar eiga að sjá um að barnið fái tilhlýðilegt kristilegt uppeldi og ég er svona að stríða foreldrunum með því að um leið og stráksi fari að ganga, tala, skilja og allt það, bregði ég mér með hann í Krossinn :)
Þau vilja meina að það sé í góðu lagi og skelfi þau ekki vitund því hann sé svo klár að það þýði ekkert að plata hann. Við sjáum nú til með það ;)
Eftir skírnaveisluna brunuðum við svo í barnaafmæli til Bjargar sem er orðin 8 ára. Hún er greinilega búin að gefa bleika prinsessu tímabilinu frí um stundarsakir, því á óskalista hennar yfir afmælisgjafir voru Vampírubúningur, hárkollur og vígtennur ! Ég ákvað að næla mér í feit prik og skottaðist niður í Leikbæ eftir blóðsugubúningi og uppskar mikið þakklæti. Í afmælisboðinu var svo ákveðið að halda smá júróvisjón teiti heima hjá okkur ,6 manns, pöntuðum Pizzur og gos, fengum reyndar kolvitlausa afgreiðslu, ÞRJÁR pepsí flöskur og Tvær agnarsmáar pizzur og engar brauðstangir. Vildi okkur til happs að við vorum ekkert banhungruð, nýkomin úr einum til tveimur veislum svo við nenntum ekki að standa í leiðréttingar-beiðnum og þrasi.
Næsta helgi verður öllu rólegri, út í sveit, í sumarbústað með Rúnari og Tamílu. Hlakka til þess ! Alltaf gott að fara út úr bænum.

Bryndís systir í fréttunum !

2006-02-15T20:28:00.000Z

Barnaafmæli
Originally uploaded by sara johanna.

Eða öllu heldur brandari sem hún samdi. Hún setti saman sögu úr barnanöfnum sem Ásdís vinkona hennar hafði gaukað að henni. Sendi svo söguna í einhvern brandarabanka í vinnunni sinni og til vina og skylduliðs. Hálftíma síðar var fólk í vinnunni farið að fá söguna utan úr bæ, sagan var komin á fúll spítt flug og farin að berast útum allar trissur í tölvupósti! Þetta var á fimmtudag í síðustu viku. Í gær birtist hún í Mogganum og var lesin upp í sjónvarpsfréttum RÚV í gærkvöldi !
Ég fékk hana í tölvupósti frá henni í síðustu viku en hafði ekki hugmynd um fyrr en núna áðan að hún hefði samið þetta :) Hógvær hún Bryndís. Síðar um daginn sendi hún endurbætta útgáfu af sögunni þar sem fleiri nöfnum hafði verið bætt við.Hér kemur endurbætta útgáfan :

Bekkjarafmælið
Ósk Ýr gekk rösklega með Brand Ara í afmælið til Egils Daða því hún var að verða of sein að sækja Leif Arnar og Loft Stein í leikskólann. Pabbi Egils Daða, Borgar Vörður, tók á móti þeim en mamma hans, Marín Hera, var í eldhúsinu.
Íbúðin var augsýnilega stappfull af krökkum. Þarna voru Hreinn Bolli, Sól Hlíf, Lind Ýr og Líf Vera, Erlendur Hreimur kom blaðskellandi innan úr stofunni og vinkonurnar Vísa Skuld og Dís Ester fast á hæla honum. Mýra Þoka lét lítið fara fyrir sér úti í horni.
Innan úr herbergi Egils Daða bárust ógurlegir skruðningar. Línus Gauti, Barði Vagn og Mist Eik voru greinilega mætt. En hvar var Rita Lín? Ekki fór á milli mála að þarna var Lotta Fönn.
Ert’ekki að verða búinn? kallaði Ævar Eiður til Gústafs Bergs inni á klósetti.
Á bílastæðinu fyrir utan var Sædís Líf í rauðum fólksvagni og Bjartur Dagur í fótbolta en vinkonurnar Saga Hlíf, Kolbrún Lind og Tína Njóla héldu sig í garðinum. Hægt og sígandi nálgaðist Jökla Þoka eftir stígnum. Hún var orðin alltof sein í afmælið.

Ég er nottla rígmontin af snillanum henni systur minni !

Brugðum okkur í skógarferð

2006-02-14T11:15:00.000Z

Originally uploaded by sara johanna.

í Heiðmörk a sunnudaginn var, og gengum fram á fullskreytt JÓLATRÉ í miðjum skóginum !!!!
Þessi óvænta sýn vakti upp spurningar sem engin svör hafa fengist við....???

Brestum í bros !

2006-02-10T10:43:00.000Z

Originally uploaded by sara johanna.

Fékk þessa áskorun senda í tölvupósti og læt hana flakka hér :
Ég gerði merkilega uppgötvun í dag. Ég uppgötvaði að bros er jafnsmitandi
og flensa.
Það brosti til mín bláókunnugur maður og ég brosti á móti og hélt svo bara áfram að brosa.
Ég labbaði fyrir næsta horn þar sem ég mætti öðrum ókunnugum manni.
Þegar hann sá mig brosa, brosti hann á móti og gekk svo brosandi í burtu.
Þá laust niður hjá mér þessari staðreynd, ég hafði smitað hann.
Guð veit hvað hann hitti marga og smitaði .
Ég fór að hugsa um þetta bros og skildi þá hversu mikils virði það er.
Eitt lítið bros eins og mitt, gæti breiðst út um heimsbyggðina.
Svo ef þú finnur að þú ert að bresta í bros, ekki halda aftur af því. Komum af stað faraldri sem fyrst, stefnan er að smita allann heiminn.
BROSTU

Ný gleraugu í sjónmáli...

2006-02-08T19:10:00.000Z

Originally uploaded by sara johanna.

Gaman að segja frá því að ég skellti mér í Smáralindina í dag til að láta mæla í mér sjónina og leggja grunn að nýjum gleraugnakaupum, enda komið næstum ár frá því að þessi biluðu í hundraðasta skipti og ég reyrði þau saman með blómavír. Ég var orðin vön þessu en samferðafólk mitt var eitthvað farið að pirra sig yfir þessu , fannst af þessu sjónmengun og vottun um leti - sem væri óþarfi að bera svona á andliti sínu.
Ég átti von á að þetta yrði 10 mínútna verk, enda algjör dekurrófa hingað til í þessum efnum á meðan Dídí var með gleraugnabúðina á Ísafirði og sá algerlega um að velja á mig gleraugu fyrirfram, þ.e. þegar ég birtist í bænum, kom hún út í dyr búðarinnar og kallaði, er ekki kominn tími á nýjar brillur? ég er búin að taka frá umgjörð sem ert bara þú ! Jú það væri ekki vitlaust svaraði ég - og eins og við manninn mælt smellpassaði umgjörðin og bingó. tók 5 mínútur !
Nú er Dídí flutt til Akraness og hætt að versla með gleraugu.
Það blasti við mér annar raunveruleiki í dag.
Í búðinni voru milljón gleraugu og það þyrmdi yfir mig. Hvernig er hægt að velja sér gleraugu þegar maður sér ekkert? Það eru bara rúðugler í þeim og maður þarf að klessa nefinu í spegilinn til að sjá sig. Ég var þarna í TVO klukkutíma. Endaði með því að efna til atkvæðagreiðslu inní búðinni, þrír afgreiðslumenn og tveir kúnnar tóku þátt og skáru úr um hvað ég ætti að gera.
Þegar ég svo spurði um verðið, var mér bent á að þau yrðu 20 þúsund krónum ódýrari ef ég keypti þau í Leifstöð, hvort ég þekkti ekki einhverja sem ættu leið þar um í febrúarlok (tekur hálfan mánuð að fixa þau, tvískipt gler) nei ég held ekki, sagði ég, en reyndi samt að láta mér detta eitthvað í hug...ætti ég kannski að skella mér eitthvað í helgarferð til að sækja þau ?......það var nú flott hugmynd þótt hún væri gjörsamlega út í hött......
Gleraugun verða tilbúin 23. feb, sagði konan og ég hélt áfram að hugsa fast. Til að dreifa athyglinni (það voru kúnnar að bíða eftir afgreiðslu) leit ég í kring um mig eins og ég væri að leita að einhverju...og rak þá augun í brosandi andlit vinkonu minnar sem ég hef ekki séð lengi. Hún stóð í dyrunum. Þú hér ! hrópar hún, og ég sagði henni frá *vandræðum* mínum. Heyrðu ég er að fara út í febrúar ! hvenær ? 23. febrúar, sagði þá vinkonan :)
Ótrúlega glæsileg tilviljun - eða hvað er þetta annars ;)
Svo nú, kæru vinir og venslamenn, Það verður vonandi loksins sjón að sjá mig, í febrúarlok- þ.e.a.s. ef gleraugun klæða mig, því það hef ég ekki hugmynd um.... Dídí afhverju fluttirðu á Akranes ???

Hvað eruð þið svo að.....

2006-02-07T18:03:00.000Z

Went to my dentist today
Originally uploaded by sara johanna.

skamma mig fyrir að vera ódugleg að blogga ? Þetta er fjórða bloggfærslan á 10 mínútum !
Hér ætla ég að gera smá prufu og skrifa bull sem eftir er af þessari færslu, til að sjá hvernig það kemur út lay-out-lega séð ;) en fyrst : þessar myndir tók ég af tannlækninum mínum í síðustu viku. og hér kemur svo bullið : xjkoso joroh jejvjifknjjkiov jeouf94phjofvewn fjiruo2pfg5 hufiope jiur49hg0e fji rpðyö hjhhldvbnkfblvblfdlvblf joorrhogho xxxx hoeohiroo jioherohohohoh hohohofhovoeru093ð-u'1£fiorohjo jgiog4hohgo4horhijhgiorhgo4hgo hjgihi4ohohghrihohgohrihogh380y0''+jphigfquifgg3p4ryho05 gnirth ng4hgoog hji4ohgoho54hoho5o ho4hohgohoohogo4hjorhiohgoho4hnj huiohuh4ogho4hohohghoerhgr hjiorhjohog uhiophioðhieopðhieorhohgohiih3ohohohghirihifjio3hohofh juijihjig jrieog jeriohjgo2pð n ghiro4 ghiro4 ghji84ö3ipfjh jrig 4jhig44o3 jirop4pgorituhgo4gnjghj4g gji uji4o jioj4g ujujo4g jjjjjj4g jiop4ji2oðjhgjkopewhjg jeiogoogjio4 gjito4 gjiji4og jgiojho4hogo4rg jio4og svo mörg voru þau orð.

Jamm !

2006-02-07T17:56:00.000Z

Pink house down town
Originally uploaded by sara johanna.

Held þetta geti bara alveg gengið upp.
Þessa mynd tók ég í dag þegar ég brá mér á Grettisgötuna í klippingu til Erlu sundvinkonu.
Bleikt hús....með því flottara sem ég hef séð, hef suðað um að fá að mála húsið hér bleikt (í eiginmanni og nágrönnum, því ég er í áföstu húsi við önnur hús) en verið harðneitað um það.
Finnst ykkur þetta hægt?

Papríka á rauðum dúk.

2006-02-07T17:50:00.000Z

red
Originally uploaded by sara johanna.

Var að uppgötva að ég get bloggað hér á flickr og sent það yfir í blogghúsið mitt !
Svo nú er að sjá hvort ég verði ekki duglegri hér á næstunni :) Dulítið öðruvísi uppsetning en kannski bara í góðu lagi, eller hur ?

2006-02-07T17:44:00.000Z

Garlic
Originally uploaded by sara johanna.

Prufa

2006-01-31T11:07:00.000Z

Þarna náði ég einu sólarskoti. Rauk til með myndavélina og tók myndir af kommóðunum mínum , ljós og skuggaspilinu í þeim í þá stuttu stund sem sólin spreyjaði geislum sínum yfir okkur Reykjarvíkurbúa í gær.
Heyrði svo í kvöldfréttum útvarps að sólskin hefði aðeins mælst í rúmar 8 klukkustundir í janúar í Reykjavík. Ég fann bara hvað ég fylltist af tilhlökkun og eftirvæntingu þegar hún lét sjá sig þessa stuttu stund í gær.
Annars er allt með kyrrum kjörum í mínum ranni, ég er bara að mála og mála myndir, ekkert gerst ennþá í atvinnumálunum , enda lítið borið mig eftir því þar sem dulítið fjör hefur verið í myndasölu hjá mér undanfarið, ekki kannski allt í höfn en fólk er svona að spá og spekúlera, sumt hvert :)
Læt þetta duga að sinni, en á myndasíðunni Flickr kem ég með nýja/nýjar ljósmyndir og pælingar daglega. endilega kíkja á það með því að smella á einhverja ljósmyndina hér og smella síðan á sara johannas photostream....eða bara smella hér :Ljósmyndirnar mínar

Hér eru kettirnir mínir að hvíla sig (alltaf að því) þarna sá ég ekki hvar annar hætti og hinn byrjaði, eins og einn köttur með tvö höfuð :)

2006-01-23T16:27:00.000Z

Fórum á stórkostlegt þorrablót í Reykjanes við Ísafjarðardjúp um helgina. Þarna er heit laug, eða pottur, stærsti heiti pottur landsins. Skemmtileg helgi að baki, en heilsan ekki uppá marga fiska þennan mánudaginn. Aðeins meira en örlar á *smá* skjálfta. Afhverju er maður svona vitlaus ? En á morgun kemur nýr dagur....sem betur fer. Get varla beðið eftir honum :)

2006-01-13T12:44:00.000Z

Það var lagið ! Nú er bjart og fallegt, snjór, snjór !
Ég er að fara að ganga frá í myndlistarskóla Kópavogs núna á eftir , hætt að kenna og á höttunum eftir nýju starfi meðfram máluninni. Hvað það verður veit nú enginn, vandi er um slíkt að spá.
Varð bara að breyta til....enda á breytingarskeiði :) Eins og áður hefur komið fram mætti það helst tengjast eldamennsku einhversskonar. Kemur allt í ljós.......

2005-12-31T14:59:00.000Z

Ég óska ykkur öllum árs og friðar og þakka fyrir samskiptin á liðnu ári !
Búin að vera húðlöt að blogga undanfarið, og bæti kannski úr því á nýju ári - en bara kannski ;), er búin að vera mun aktívari á myndablogginu undanfarið, á flickr, sem er bráðskemmtilegt bloggland og endilega kíkið þar við annað veifið með því að smella á einhverja mynd hér og fara svo inní sara johanna´s photostream !
Þessi mynd sem fylgir hér er t.d. af grænmetinu sem fer í rétt kvöldsins, nú ætla ég að prófa að gera spænska Paellu með sjávarfangi (hörpudiski og rækjum) og grænmeti og belgbaunum. Hér verða 17 manns í mat og við höfum þann háttinn á að við systkinin mætum hvert með okkar rétt og setjum hér á hlaðborð. Oftast er þema, svo réttirnir séu þokkalega samstæðir, t.d. kjúklingaréttir, en í ár er það bara eitthvað létt og laggott og verður spennandi að sjá útfærslurnar :)
Ég er búin að leggja á borð, fór í partýbúðina í gær og keypti þessa líka flottu skærbleiku plastdiska (því hver nennir að vaska upp á gamlárskvöld?) til að hafa á bleikum og appelsínugulum dúkum og allskonar konfettí og fjör til að skreyta borðið með..... síðan eru það blöðrur og krullubönd all over. Örugglega verður þetta eitthvað myndrænt og myndavélin gripin í hita leiksins !
Góða skemmtun í kvöld, öllsömul ! :)

2005-12-25T12:49:00.000Z

Óska ykkur öllum Gleðilegrar hátíðar með þessari mynd af Tamilu, þegar hún var að leggja lokahönd á skreytingu á jólatrénu hjá okkur í gærkvöldi. Ég bara virkjaði gestina í verkin, Tamila skreytti, Rúnar gerði valdorfssalatið, og Viðar þeytti rjómann. Við Gísli stóðum svo yfir pottum og pönnum, nema brúnuðu kartöflunum sem Rúnar og Gísli sáu um og urðu þessar dýrindis karamellur. Allt var svo tilbúið um átta-leitið (hér eru engin lítil börn, svo allt er hægt að gera í rólegheitum) Höfðum það svo notalegt langt fram á jólanótt.
Jóladagur byrjaði svo með gleðifrétt : Elín Björk eignaðist frumburð sinn, dreng kl. hálf-12 á hádegi !
Svo nú er ég orðin svona smá ská-amma :)
Til Hamingju, Elín og Daníel !

2005-12-23T16:08:00.000Z

Frábær skötu-samkoma að baki , Skatan bragðaðist unaðslega (takk fyrir hana, mamma og pabbi! ) og gestirnir voru kátir og skemmtilegir að venju- örugglega bleika dúknum að þakka :) . Svo kom einn gestanna (Diddi kokkur) með þessar dýrindis skyrtertur í desert sem settu punktinn yfir i-ið !
Umræður og hlátrasköll fylltu húsið. Góður inngangur í jólin !
Nú brunum við í bæinn á rölt......

2005-12-23T09:15:00.000Z

Nú fer skötuboðið að bresta á. Ég lagði á borð áður en ég fór að sofa í gærkvöldi, allt bleikt að þessu sinni (skrýtið!)
Um tólf leitið fara gestirnir að streyma inn, 29 að tölu.
Skatan er komin í hús, en hún er samkvæmt venju í boði foreldra minna, vel kæst vestfirsk tindabykkja, verkuð á Súgandafirði og að sjálfsögðu höfum við hnoðmör með og heimabakað rúgbrauð sem Magga svil bakar og tekur með sér. Ég á örugglega eftir að dæla inn myndum af boðinu í kvöld ef ég þekki mig rétt ..... gaman, gaman.......

2005-12-21T10:45:00.000Z

Til hamingju með stúdentsprófið, Helga sætust !
Og takk fyrir flotta veislu í gær !
Þú varst stórglæsileg, ekkert minna.

2005-12-18T21:19:00.000Z

Það fór eins og mig grunaði, eitthvað fjör hljóp í mig eftir göngutúrinn á bíllausa daginn minn og í dag afgreiddi ég slatta af verkefnalistanum, meðal annars hressti ég upp á tvær gamlar og ljótar kommóður með bleikum akrýl litum (skvettist á einn kött í leiðinni, málaði hann þá bara líka, fyrst ég var með bleikt í penslinum. Svo nú er stofan öll að koma til. Ýmsa fleiri breytingar eru í farvatninu.....semsagt, komin í stuðið :)

2005-12-16T17:42:00.000Z

Kláraði kennsluna fyrir jól í gær, semsagt formlega komin í jólafrí svo nú er ég að byrja að velta jólakortadæminu fyrir mér.
Hér heima bíða mín milljón verkefni og erfitt að taka ákvörðun um á hverju ég á að byrja. Ég ætlaði að skreppa af bæ, ná í myndir úr framköllun og fleira en komst að því að bíllinn var rafmafnslaus, hefur ekki þolað frostið í nótt og morgun, batteríis og orkulaus eins og eigandinn. Kannski táknrænt?
Ég fór því aftur inn og klæddi mig í skíðagallann ,slóveníu-skinnhúfuna , pakkaði mér inn í margra metra trefil þar að auki og fór svo fótgangandi erinda minna. Það var bara mjög hressandi, en ég varð vör við hvað hreyfingarleysi mitt er svaðalegt, því þetta tók töluvert á. Nú er semsagt blóðið farið að renna í mér og pumpan kát með nýja starfið.....
kannski ég fari bara að komast í stuð ;)

2005-12-10T22:39:00.000Z

Borðstofuborðið rúmum sólarhring síðar. Rúnar og Tamila að kveðja eftir viku dvöl og litlu skemmtilegu frænkur mínar að koma til sólarhringsdvalar. Þær lögðu á borð á meðan ég steikti kótilettur í raspi .
Bleikur dúkur , rauðar hekludúllur og kerti á sitthvorn endann var það sem systurnar völdu á borðið og jólagjafirnar sem ég er að útbúa vildu þær endilega prufukeyra......say no more......

2005-12-09T12:42:00.000Z

Mamma hringdi og kvartaði yfir bloggleti minni, hélt ég væri lögst í kör.
Nei ekki er það nú alveg og því til sönnunar birti ég hér mynd af borðstofuborðinu mínu þennan daginn. Sitthvað á seiði þó ekkert af því sé húsmóðurlega séð til fyrirmyndar nema síður sé. Vinnukona óskast - til að gera það sem ÞARF að gera, ég sé um hitt !
Með þessari iðju minni hlusta ég á kúbanska tónlist og sitthvað fleira, allt nema jólalög og jólakveðjur. Jólin koma bara þegar þau koma og ég nenni ekki að stressa mig yfir því, reyndar er letin komin í mjög jákvæðan farveg og lýsir sér nú bara í því að ég nenni ekki að stressa mig yfir neinu.
blogga meira þegar ég nenni :)

2005-12-03T23:51:00.000Z

Haldiði að letibykkjan hafi ekki lent í massívum flutningum upp níðþrönga bratta stiga í dag !
Bróðir minn og frú voru að flytja upp á þriðju hæð í gömlu húsi í vesturbænum og blessaður drengurinn hafði ekki haft tíma til að sortera og henda úr yfirfullri geymslunni, svo allt draslið sem átti að vera farið ýmist í sorpu eða góða hirðinn var flutt í nýju híbýlin og þar alla leið upp í turn (geymslan er á fjórðu hæð !) og svo þykist hann ætla að sortera og henda mjög bráðlega hm ! mig grunar að þetta bráðlega komi seint ;) Við þekkjum nú öll geymslu-syndrómið.
Ég komst að því eina ferðina enn, að ég þyrfti eiginlega að fara að þjálfa eitthvað upp á mér skrokkinn, gjörn á að gleyma því síðan fljótt aftur. Ég er svo lurkum lamin, með sinadrátt og name it að ég ætla bara að skríða snemma upp í , annað kvöldið í röð. Þau gista hér næstu nætur, nýfluttu hjónin því enn er verið að gera við gólf í nýju íbúðinni (sem er gömul) svo við stöfluðum öllu innbúinu þeirra í þrjú lítil herbergi, ekkert pláss fyrir uppbúið rúm þar.
Það verður því huggulegheita famelí-frúkostur hér í fyrramálið :)

2005-12-02T22:13:00.000Z

Ef það er hægt að deyja úr leti, þá er ég í andaslitrunum.....þið megið fara að gera uppkast að minningargreinunum. Ég er í fullkomlega hlutlausum gír og nenni ekki einu sinni að teygja mig í gírstöngina til að skipta um gír !

Það er pappakassi búinn að vera á stól hér í marga daga, pappakassi sem ég skar pappa úr til að búa til pappamassa-aðventukrans (sem ég hef ekki nennt að klára)
og stóllinn með kassanum ofan á sér stendur í gangveginum, þannig að ég þarf að taka á mig langan aukakrók til að svara í símann, en nei, frekar geri ég það en að færa kassann og stólinn til. Kassinn á t.d. heima ofaní kjallara og er örugglega kominn með heimþrá. Í dag píndi ég mig samt í eitt verkefni, sem ég var búin að gera 100 sinnum í huganum undanfarna daga, ég tók niður dökkgráar (eiga að vera hvítar) eldhúsgardínurnar og stakk þeim í þvottavél. Þær eru komnar upp aftur, orðnar hvítar og ég er búin að klippa neðan af þeim þar sem þær voru alltof síðar og náðu langt út á gólf. Falda þær svo kannski fyrir páska eða næstu jól. Þvílíkt afrek ! og svo eldaði ég ungverska gúllassúpu, en því nenni ég reyndar alltaf.

Samt líður mér vel og hef ekkert samviskubit yfir letinni, held þetta sé bara heilbrigt og hollt svona annað veifið. Gott að skríða svona inní sjálfa mig í svartasta skammdeginu. Þessi leti hefur auðvitað náð yfir blogg tilþrifin líka, lítið verið um þau. Og nú er kl. bara 10 á föstudagskvöldi og ég er að hugsa um að skríða bara í bólið með góða bók og njóta letikastsins í botn.....
Mæli með svona kasti !

2005-11-28T17:08:00.000Z

Komin til baka frá Slóveníu sem heillaði mig gjörsamlega uppúr skónum !
Þessi staður sem er á myndinni heitir Bled og er fegurðin þar þvílík að það er eins og að standa inní miðju póstkorti að vera þarna - nánanst óraunverulegt. Samt var þar þoka og skyggni lítið .
Hvernig lítur þetta þá út í góðu skyggni ??
Ég get alveg lofað því að þetta var mín fyrsta en ekki eina ferð til Slóveníu. Ég er strax farin að plana ferð þangað næsta sumar til að fagna tilvonandi stórafmæli mínu !
Ég hafði eiginlega ímyndað mér fyrirfram svona sjarmerandi austantjalds-lands stemningu, hænur og svín á götum, görðum og svölum, en þetta er í raun mjög vestræn borg - sem voru í fyrstu dulítil vonbrigði. Þau hurfu þó fljótlega í skuggann af sjarmerandi fólki, afslöppuðu og vingjarnlegu og mjög fallegum gömlum bleikum byggingum.
Maður er alltaf að sjá það betur hvað við íslendingar erum geðbilaðir taugaveiklaðir og stressaðir upp til hópa, hvað er þetta eiginlega með okkur ? - bara göngulagið og andlitssvipurinn á fólki hér er eins og heimurinn sé að farast eftir fimm mínútur og annaðhvort núna eða strax þurfi að gera þetta og hitt áður en heimsendir brestur á ! - Kunnum ekkert að lifa og njóta !
Það snjóaði látlaust í sólarhring þarna, sannkölluð alpasnjókoma, logn og risastór snjókorn a´la póstkort, og snjórinn uppá miðja kálfa. Ösluðum þarna um með húfur, trefla og regnhlífar.
Enn sem komið er er nánast allt þrefalt ódýrara en hér enda laun fólks í landinu fáránleg miðað við okkar.
Þetta á þó eftir að breytast þegar evran verður tekin upp árið 2007, þá kemur allt til með að rjúka upp í verði eins og annars staðar. Núna um helgina var þarna mikil kröfuganga þar sem verið var að mótmæla fyrirhuguðum hækkunum á virðisaukaskatti úr 8 % í 20 % svo það stefnir ekki í góð mál varðandi verðlagið.
Íslendingarnir létu náttúrulega greipar sópa og versluðu eins og þetta væru síðustu dagar sem búðir væru opnar, sjálfum okkur lík ;)
Ég tók þátt í því og keypti mér tvær húfur , tvö pils og tvær perlufestar ! Tímdi ekki að eyða meiri tíma í verslunum enda svo margt annað meira spennandi ......

2005-11-23T23:57:00.000Z

Snúður Rúsínuson er strax farinn að sakna mín !
Var að klára það leiðinlegasta af öllum leiðinlegum húsverkum í heimi hér, að strauja öll hör-fötin mín.
Þetta eru fjórar flíkur, en svo undarlegar í laginu að það krefst mikillar útsjónarsemi og þolinmæði að strauja inn í öll skúmaskotin á þeim og ekki bætir úr skák að þau voru orðin eins og harðfiskur viðkomu eftir full mikið hangs á snúrunum.
Verkið tók klukkutíma og korter.......pásulaust !
En flott eru þau og sannast á þeim hið fornkveðna að bjúti is pain !
Ástæðan fyrir þessum verknaði ? Víííííííí ! ..... ég er að fara til Slóveníu í fyrramálið, til Lubljana , á vinnustaða-árshátíð , hvar ég kem til með að skarta hör-búningunum !
Hlakka bara töluvert til. Hver veit nema ég bloggi þaðan
.....efðasé nettenging !?
bless á meðan og verið sæt og góð um helgina :)

2005-11-18T15:30:00.000Z

Erla perla var að klukka mig !
hefst nú lesturinn:
núverandi tími: 15.15
núverandi föt: pils sem helga er hætt að nota og fallega ljótur bolur, röndóttur.
núverandi skap: tja.....
núverandi hár: minnir mig á að ég þarf að panta klippingu.
núverandi pirringur: tja, tja.....
núverandi lykt: kannski ég ætti að fara í sturtu.
hlutur sem þú ættir að vera að gera núna: taka til, mála, kaupa inn.......
núverandi skartgripir: giftingarhringur og trúlofunarhringur (er trúlofuð sigrúnu)
núverandi áhyggjur: tannholds.....
núverandi löngun:orka, kraftur, rok og lárétt rigning !
núverandi ósk: rigning
núverandi farði: zero
núverandi eftirsjá: nenni ekki að standa í eftirsjá, lífið er of stutt til þess !
núverandi vonbrigði: lognið
núverandi skemmtun: klippa táneglurnar
núverandi ást: blússandi
núverandi staður:vitlaust staðsettur
núverandi bíómynd: beautiful mind, skoða hana í kvöld
núverandi íþrótt: skil ekki spurninguna
núverandi tónlist: lagið, Til þín,Hjálmar á rás 2
núverandi blótsyrði: þögn
núverandi msn manneskjur: er með ichat, ekki msn, viðar og helga.....
núverandi desktop mynd: fótósjoppuð mynd af sólrúnu frænku og grískum ketti
núverandi áætlanir fyrir kvöldið: góður matur, beautiful mind...
núverandi dót á veggnum: veggjalýs og naglagöt
ég klukka : Garrann, Önnu Kristjáns, Ylfu og Val !

2005-11-18T13:35:00.000Z

Vorum að pappamassa í gærkvöldi, pempíurnar,
heima hjá mér.
Mæli með þessum gjörningi, gaman að massa !
Tökum að okkur að koma í saumaklúbba og setja
svona dæmi í gang.....en það er MJÖG dýrt að fá okkur !
Bara fyrir þær allra ríkustu að ráða við það......
sorrý, life is a bitch and then......

2005-11-16T10:26:00.000Z

Meira varðandi Val :

Það hefur verið opnaður reikningur sem hægt er að leggja inná til að styrkja Val.
1175-26-511739 og kennitala: 220552-3739 og Fálkar sem auðkenni. Lesið nánari upplýsingar í kommentakerfinu á bloggsíðu Vals. Honum er ætlað að lifa af loftinu í nóvember og desember og stórskertum bótum eftir það !
Pistillinn heitir : Minkur í hænsnahúsi 1 , og er hér !

2005-11-14T20:48:00.000Z

LESIÐ ÞETTA !
.... Valur Höskuldsson verulega heyrnarskertur sjúklingur með MND sem er hreyfitaugahörnun ( sem er ólæknandi ) og áhugamaður um útrýmingu Minka , sem stendur og horfir á líf sitt og Tilveru hrynja til grunna .

......Þetta er niðurlagið á bloggfærslu vinar míns Vals Höskuldssonar í dag.
í pistli dagsins lýsir hann nýjasta útspili tryggingarstofnunar gagnvart honum, ekki fögur lesning það ! Þetta eru reyndar tveir pistlar, Minkur í hænsnahúsi 1 og 2...

2005-11-13T19:30:00.000Z

Skáldajötunn

Þú ert nýjungagjarn, tilfinningaríkur innipúki.

Skáldajötunninn er svo opinn fyrir nýjungum á sviði lista og menningar að honum tekst að sjá list út úr óbreyttri skranhrúgu eða einmana slettu á striga. Skáldajötunninn tekur til í herberginu sínu og kallar það listrænan gjörning. Hann er mjög líklega með óskrifaða skáldsögu í hausnum eða óútgefna bók í skrifborðsskúffunni, þ.e. ef hann hefur ekki þegar fengið bók sína útgefna.
Skáldajötunninn lifir fyrir listina og myndi frekar kaupa blek fyrir fjaðurstafinn sinn heldur en brauðhleif þótt hann hefði farið án matar svo dögum skipti. Hann unir sér vel einn með eigin hyldjúpu hugsunum.
Hvaða tröll ert þú?

2005-11-12T17:32:00.000Z

Í kvöld ætla ég að gæða mér á eftirfarandi: Tortellini formaggi, með salsa al formaggio sósu og steiktum kjörsveppum.
Þessu ætla ég að skola niður með vel kældu Lindemans Bin 65 Chardonnay, 2004 , horfa á Mugison á rúv og halda svo áfram að leika mér í photoshop :)
Ég er grasekkja, alein heima með köttunum og hef það næstum því fullkomið.
Ef ég væri til í tvíriti myndi hin ég taka til og þrífa hér, en þar sem það er ekki í boði hef ég bara daufa birtu, kveiki á kertum og leyfi mér að líða vel.....
góða helgi !

2005-11-08T21:36:00.000Z

Hér er málverkið sem ég var að tala um.....
betra að smella á myndina til að skoða hana stærri. :)

2005-11-08T09:44:00.000Z

Fyrsta ljósmyndin mín sem birtist opinberlega !
þ.e.a.s. í blöðunum.
Hann Hannes hennar Laufeyjar er svo kjarkaður,
að hann bað mig að taka mynd af sér
og Elísabetu Waage hörpuleikara til að hafa með fréttatilkynningum um
hádegistónleika í norræna húsinu á morgun, 9. nóv. Þetta er í mogganum í dag,
en þeir þurftu endilega að klippa neðan af henni.....sjá bls. 36 ;)
Annars er ég að mála doltið skondna mynd sem ég sýni ykkur kannski bráðum.
og annað það að nú eru jólin að laumast að mér - ekki laust við að fiðringurinn sé að koma.
Alltaf sama sagan, ég tek jólin út í nóvember og byrjun desember,
en svo eru þau á bak og burt þegar kemur að þeim á dagatalinu......
skil þetta ekki..........

2005-11-05T22:53:00.000Z

má til með að birta þessa mynd af mömmu og viðari,
sem var að kenna henni á tölvuna nýju fínu í gærkvöldi....
og undirbúa hana fyrir internet-tenginguna.
borðuðum svo góðan appelsínukjúkling og höfðum það næs,
fram á nótt....
pabbi var lítið að pæla í tölvunni, las frekar blöðin (sjá vinstra hornið uppi á myndinni) og horfði á sjónkann með gísla.
Annað kvöld koma svo tengdaforeldrarnir og börnin okkar í mat.
sannkölluð fjölskylduhelgi :)
og garðar : ég og tengdamamma ætlum jafnvel í fíló fyrir matinn :)

2005-11-02T00:06:00.000Z

Sumir dagar eru ekki alveg í lagi !
Dagurinn í dag var einn af þeim. Klúður á klúður ofan. Eftir kennsluna brunaði ég niður í Litaland í lita og strigakaup, staflaði varningnum í bílinn og ók hróðug af stað heim, öryggið uppmálað nýbúin að skipta yfir á nagladekkin ( gær). Það var brjáluð umferð, allir á heimleið og þegar ég var búin að koma mér vel fyrir á vinstri akgrein (hraðlínunni) hvellsprakk annað framdekkið ! Ég skellti hazardljósunum á og stoppaði auðvitað....
Það er kannski skömm frá því að segja en ég kann ekki að skipta um dekk... (þetta er leyndarmál) svo ég greip símann og hringdi í aumingja gísla sem lá veikur heima - maður á náttúrulega ekki að segja frá þessu.....
Hann tók af sér nátthúfuna , setti upp ullarhúfuna og sagðist vera kominn eftir korter. Ég sat bara skelfingu lostin í bílnum og starði í baksýnisspegilinn og bjóst við bíl krassa á mig á hverju næsta augnabliki....þeir óku flestir eins og þeir væru með fæðandi konu í bílnum eða sjúkling sem væri um það bil að blæða út og svo var orðið launhált í ofanálag, ég áttaði mig á því þegar saltbíllinn þaut fram hjá á fullu blasti og saltið spýttist á bílrúðuna.
Ég hafði stoppað eins mikið útí kanti við girðingu sem aðskilur umferðina út og suður - og mögulegt var ...nema hvað , birtist ekki löggubíll fyrir aftan mig með bláu ljósin blikkandi og ég hoppa út úr bílnum dauðfegin að sjá bjargvættina -
--neinei, þá öskrar löggan uppí eyrað á mér : ætlarðu að láta keyra aftan á þig !!!! komdu þér eins og skot uppá gangstétt hinum megin (mig grunar að hann hafi langað til að segja : hálfvitinn þinn) Þeir stoppuðu svo umferðina, létu mig keyra yfir og uppá snjóskafl. Stukku svo upp í sinn löggubíl og brunuðu í burtu.
Eins gott að ég var með símann.
Stuttu síðar kom svo veiki maðurinn og upphófst nú dekkjaskipting í brunagaddi (ég þarf að fá mér dúnúlpu komst ég að) Það tók óratíma að tjakka hann upp, enginn eðal tjakkur , svo var skipt um dekk , og tjakkað niður....og kom þá í ljós að varadekkið var alveg flatt ! svo nú þurfti að tjakka aftur upp og taka dekkið af... ég sór og sárt við lagði að síðast þegar sprakk hefði ég farið með dekkið í viðgerð, svo gísli tók dekkið og brunaði á næstu bensínstöð og pumpaði lofti í það. Heim komum við svo tveimur klukkutímum eftir að ósköpin höfðu dunið á, ég nánast gaddfreðin, en gísli var í skynsamlegri vetrarfatnaði svo hann var ekki eins kaldur enda eins gott, veikur maðurinn....
Hér hefur farið fram mikil kakódrykkja í kvöld og ég var komin í fjórar peysur þegar mest var, en svo kom svitakóf svo nú er ég bara í einni þunnri ;)

2005-11-01T01:39:00.000Z

Búin að skemmta mér vel í fótósjoppunni í kvöld.
það má deila um hvort útkoman er bull en það skiptir engu máli.
þetta er eins og að detta ofan í góðan dótakassa.
Fór í verslunarleiðangur í dag með foreldrum mínum, annarsvegar í tölvubúð
til að kaupa tösku undir tölvuna hennar mömmu og hinsvegar í ljósabúð að kaupa ljósaperur !
Í tölvubúðinni ( apple, auðvitað ) sá ég teiknibretti til að tengja við tölvuna - einmitt upplagt í fótósjoppið, en kostar morðfjár (45 þús) svo enn bætist á óskalistann minn.... sem ég var að fatta að inniheldur bara tæki !
.......öðru vísi mér áður brá .....

2005-10-30T10:55:00.000Z

Íðilfagur sunnudagsmorgunn en skítkaldur...
Þá sjaldan maður lyftir sér ekki upp á laugardagskvöldi og fer að sofa um miðnætti af einskærri syfju, vaknar maður fyrir allar aldir á sunnudegi og það rifjast upp að þetta eru bestu stundir vikunnar ! Kyrrðin er alger, allir meira og minna sofandi, tími ekki einu sinni að kveikja á útvarpinu....og þegar allt er svona bjart og hvítt eins og núna, þá er maður nálægt himnaríki.
Bóndinn og smiðurinn eru búnir að vera að smíða tröppur bak við hús í gaddinum um helgina, skjótast svo inn öðru hverju í heitann kaffisopa nánast freðnir, hetjurnar.
Mamma og pabbi búin að vera að bíða eftir flugi síðan á fimmtudag, til borgarinnar- stendur vonandi til bóta í dag.
Annars er ég búin að vera dugleg að mála um helgina og á föstudagskvöld fórum við í bíó sem gerist mjög sjaldan. Mæli ekki með myndinni, heldur endaslepp, Flightplan heitir hún.
ætla nú að horfa á endursýningu á hljómsveit kvöldsins í gær, sem ég hafði gaman af - en grunar að hafi stuðað einhverjar fínt fölende sálir :)........

málverk í bígerð....

2005-10-25T13:49:00.000Z

Fór í bæinn í gær, i gönguna stóru og hitti ábyggilega að minnsta kosti 50 manns ,
sem ég þekki en hef ekki séð lengi...það var gaman ! Það er allt svo litríkt ofan í bæ....
gæti sko hugsað mér að búa þar í grenndinni......
Hér í efra er allt eins og lítið um skrautlegt umhverfi og skrautlega
karaktera- hér sést ekki hræða á ferli, nema snemma á morgnanna á bílastæðinu
og rétt fyrir kvöldmat - á bílastæðinu og með innkaupapoka frá nettó eða þinni verslun !
já- þannig er nú það......

2005-10-22T10:34:00.000Z

pistillinn sem kemur hér er ekki skrifaður af mér,
en er eins og talaður úr mínum munni !
fékk þetta sent í tölvupósti, eitthvað sem gengur manna á milli og
tek mér það bessaleyfi að birta hann hér.
nafn þess sem skrifaði er undirritað. ég gæti ekki verið meira sammála þessu.
Myndin sem fylgir er af mér og félögum, tekin árið 1959 !

Ég var að spjalla um daginn við vin minn um ,,þá gömlu góðu daga" og við
komumst eiginlega að því að fólk sem er eldra en 30 ára ættti í raun að vera dáið.
Já, samkvæmt löggjöfum og skriffinnum nútímans ættu þau okkar sem voru börn
á 5., 6., 7. og fyrrihluta 8. áratuga síðustu aldar ekki að hafa lifað af.

Barnarúmin okkar voru máluð með blýmálningu. Það var engin barnalæsing á
lyfjaglösum, hurðum eða skápum og þegar við hjóluðum notaði ekkert okkar hjálm.
Sem börn sátum við í bílum án öryggisbelta eða púða. Að fá far á
vörubílspalli var sérlega gaman.

Við borðuðum brauð með smjöri, gos með sykri, en fæst okkar lentu í
offituvandamálum, því við vorum alltaf úti að leika, Við deildum gjarnan
gosflösku með öðrum og allir drukku úr sömu flöskunni án þess að nokkur létist.
Við vörðum löngum stundum í að byggja kassabíl úr dóti og drasli og þutum
á honum niður brekkuna, bara til að uppgötva að við höfðum gleymt bremsunum
Eftir nokkrar veltur lærðum við að leysa vandamálið. Við forum að heiman
snemma á morgnana til að leika okkur allan daginn og komum aftur heim í
kvöldmat . Enginn hafði möguleika á því að ná í okkur yfir daginn.

Engir farsímar. Ha, engir farsímar? Óhugsandi!
Við áttum ekki Playstation, Nintento 64, X-box, enga tölvuleiki, ekki
fjölmargia rásir í sjónvarpinu, ekki video, ekki gervihnattasjónvarp, ekki
heimabíó, farsíma, heimilistölvu eða spjallrásir á Internetinu. Við
eignuðumst vini! Við fórum bara út og fundum þá.

Við duttum í skurði, skárum okkur, fótbrotnuðum, brutum tennur, en enginn
var kærður fyrir þessi óhöpp. Þetta voru jú óhöpp. Það var ekki hægt að
kenna neinum um. Nema okkur sjálfum. Manstu eftir óhappi?
Við slógumst,
urðum blá og marin og lærðum að komaast yfir það.
Við lékum okkur í nýbyggingum, fundum upp leiki með naglaspýtum og drasli
og átum maðka. Þrátt fyrir aðvaranir voru það ekki mörg augu sem duttu út
og ekki lifðu maðkarnir inni í okkur til eilífðar. Við hjóluðum eða gengum
hvert til annars, bönkuðum á dyrnar, gengum inn og létum eins og heima hjá okkur.
Við lékum okkur úti eftir kvöldmat, fórum í fallin spýta, eina krónu,
eltingaleik eða feluleik, svo ekki sé minnst á löggu og bófa. Það þurfti
engar félagsmiðstöðvar eða neina til að stjórna okkur. Við stjórnuðum
okkur sjálf. Sumir nemendur voru ekki eins glúrnir og aðrir, þeir lentu í
tossabekk. Hræðilegt! En þeir lifðu af.

Það var farið í þrjúbíó á sunnudögum og Andrés Önd var á dönsku, sem hefur
hjálpað mörgum námsmanninum í að fóta sig í Norðurlandamálunum seinna meir.
Það var jú ýmislegt annað sagt en Gisp! Og Hva? í þeim.
Þessi kynslóð hefur alið af sér fólk sem er tilbúið að taka áhættu, er góð að
leysa vandamál og er bestu fjárfestar frá upphafi. Síðustu 50 ár hafa verið
sprengja nýsköpunar og nýrra hugmynda. Við áttum frelsi, sigra ósigra og
ábyrgð og við lærðum að takast á við það allt saman.
Við sem ólumst upp áður en löggjafi og stjórnvöld settu lög og reglur um
líf okkar, sem er okkur sjálfum fyrir bestu.

Við áttum gott líf

Gunnar Kr Sigurjónsson

2005-10-20T10:16:00.000Z

Ég sagði frá því um daginn að mamma hefði keypt sér fartölvu. Áður hafði hún fengið sér digital myndavél og nú var hún að senda mér disk með fyrstu myndunum og þvílíkt sem þær eru fallegar ! Hún tók þær 23. september þegar hafði kingt niður snjó á Ísafirði og sumarblómin voru enn í fullum blóma ! Ég fékk leyfi hjá henni til að setja þær inná flickr (myndasíðuna sem þið komist inná ef þið smellið á myndina)
Nýjustu fréttir af mömmu eru svo þær að hún er að fá sér þráðlausa nettengingu, verður sett upp á næstu dögum.
Ellin er ekki kvíðaefni þegar maður verður vitni að svona atburðum !
Annars þakka ég ykkur fyrir atvinnuábendingarnar, ég er enn að spá og spekúlera og veit að eitthvað gott á eftir að koma út úr því.....hafið mig áfram í huga ef þið verðið vitni að einhverri skemmtilegri lausri stöðu.
og annað :ég er búin að skrá mig í fjarnám í ljósmyndun og byrja í því næstu daga svo nú er ég spennt :)

2005-10-17T13:40:00.000Z

Nú bráðvantar mig vinnu eftir áramót !
Síðustu vikur og mánuði hefur lítið sem ekkert af aurum lent í buddunni minni.
Lítil sem engin málverkasala , skilst að mest sé að seljast eftir dáið fólk um þessar mundir og svo er líka hægt að fá innflutt málverk í Rúmfatalagernum og í Tékk-kristal fyrir þetta á verðbilinu eitt þúsund og fjögurhundruð (nítíu og níu) til sex þúsund krónur :)
- svo ég er í dulítið lélegri samkeppnisstöðu.
Nema hvað, þá er bara að skipta um djobb og þar sem gekk svo vel hjá ylfu frænku að fá húsnæði með því að nefna vandræði sín á blogginu sínu, ætla ég að sjá hvort þetta virkar eins vel hjá mér....
semsagt, ef einhver veit um hentuga vinnu fyrir stundvísan og reglusaman starfskraft.....þá endilega láta mig vita.
Hér koma nokkrar vísbendingar um hvar styrkleikar mínir liggja :
1 Flink að skera gulrætur og jafnvel lauk, sé ég með góð sundgleraugu
2 góð við ketti
3 flink að svara í síma, sérstaklega þegar ég er vel vöknuð
(fram að því er ég með karlmannsrödd...sem gæti auðvitað verið kostur...)
4 góð í að skipuleggja holla lífshætti - fyrir aðra......
5 hef eldað svikinn héra !
6 kann að leggja á borð....
7 kann að blanda liti - og drykki....
8 líkar vel að vera í líflegu umhverfi
9 gaman að elda mat
10 og svo framvegis .........

dettur ykkur eitthvað passandi í hug?
Vegleg fundarlaun í boði fyrir þann sem finnur vinnu handa mér !

2005-10-15T13:46:00.000Z

Verð að segja að ég er nokkuð stolt af skósmekk sonarins
(svo ekki sé talað um buxnasmekkinn)
Fann þessa mynd á netinu , hef ekki enn séð þessa skó
í raunveruleikanum - glæsilegir skór !
Hvað græna límbandið er að gera þarna veit ég ekki,
Ætla að spyrja hann næst þegar ég heyri í honum....

2005-10-14T10:21:00.000Z

Til að róa trekktar taugar, dundaði ég mér við fótósjopp
tilraunir fram eftir síðkvöldi í gær. Þessi er samt ekki eins
vönduð og hin sem ég gerði líka :

þessi altso ! finnst mér
skárri. smelltu á hana
viljirðu sjá hana betur....

2005-10-13T13:05:00.000Z

Fann skíðagallann í morgun og byrjaði daginn með göngutúr í
þessu líka fallega veðri. Snjórinn eins og hveiti hefði verið sáldrað á göturnar
og sólin svo lágt á lofti að skuggarnir teygðu sig langar leiðir
og ég hæstánægð með skuggann minn því samkvæmt honum
var ég afburða há og grönn :)
Það er bara þægilegt að vera úti í logni og frosti
þegar maður er í hlýjum og góðum galla.
Annars er ég frekar frústreruð innan í mér þessa dagana , hálf pirruð
og leiðinleg og á auðvelt með að hafa allt á hornum mér (annað með halann;)
Gæti spilað þar inní að ég var að hætta að reykja - í fjórða skipti -
síðasta bindindi stóð í 7 mánuði og þegar ég sprakk var eins og
ég þyrfti að bæta mér það upp og reykti helmingi meira en áður :(
sem gæti verið ástæðan fyrir svæsnum fráhvarfseinkennum núna.
búin að vera hætt í þrjá daga....denne gangen ;)

2005-10-10T12:54:00.000Z

Keypti þessar í Grikklandi um daginn, himneskar á bragðið, ætlaði einmitt að bjóða þær gestunum á laugardag en steingleymdi því- heppin ;) nú úða ég þeim í mig og get ekki stoppað. Þetta er hádegismaturinn minn í dag.
Annars er dagurinn í dag svona mánudagur sem hefst á sjálfsniðurrifi og í framhaldinu fögrum fyrirheitum um betrun í hinu og þessu, fara að hreyfa sig, huga meira að hollustu, vera duglegri og so on....
Ætlaði að byrja með stæl, en snéri við í dyrunum....kalt-kalt, brrrrrr.... eins og kettirnir þegar þeir snúa við í dyrunum
þegar þeir komast að því að það rignir.
Fallegt gluggaveður í dag :)

2005-10-08T17:46:00.000Z

Mmmmmmm.......nú er gaman í eldhúsinu !!!
Músíkin á fullu blasti og indverski kryddilmurinn smýgur inní hverja taug :)
Kátir kokkar, ég og Garrinn.....Búin að dæla inn myndum á flickr
og fleiri koma síðar :) , smellið á myndina til að sjá....meira .

2005-10-07T13:40:00.000Z

ég er búin að vera alveg húðlöt síðan ég kom heim, og alveg sérstaklega blogglöt.
tekur alltaf smá tíma fyrir mig að lenda eftir svona útrás.
Held helst að sálin verði eftir og gefi sér góðan tíma í að elta mig til baka.
Nú er haustið alveg komið í allri sinni litadýrð,með sinn kulda og sem betur fer sjarma líka.
Á þessum árstíma hef ég oft gefið mér heit um að núna skuli kýla á
aukna samveru við vini og fjölskyldu, bjóða í mat og gera eitthvað skemmtilegt.
Sjaldan hef ég staðið við það en núna ætlum við Garðar mágur að leggja línuna fyrir komandi vetur
og galdra fram indverskt matarboð annað kvöld, átta manna !
Garðar mætir þá hingað uppúr hádegi á morgun og við brettum upp ermar og eldum fimm rétta máltíð
með engu svindli, engar tilbúnar krukkusósur eða nokkuð slíkt, allt sem mylja á verður mulið í morteli
og gert eftir kúnstarinnar reglum.
Við höfum einu sinni gert þetta áður, fyrir 12 árum, vorum þá að elda frá kl. 13 til 21, en þá hófst átið.
átta tíma eldamennska !!! en mjög skemmtileg iðja, finnst okkur.
Helga kom til mín í morgun og snurfusaði íbúðina heilan helling, hún er mjög flink í því en ég síður ;)
svo hér ilmar allt af skúringarlykt og dagblaðsstaflar og aðrir staflar komnir á sinn stað.
hér verður því allt með felldu annað kvöld :) hlakka til !

2005-10-04T11:24:00.000Z

Komin til baka frá Krít og byrjuð að þvo þvott.
Komum ekki í hús fyrr en um miðja nótt
og sváfum eins og grjót til hálf ellefu. Ferðin var alveg frábær, alveg mátulega heitt (28 stig) mikið slakað, borðað og drukkið, eins og verða vill í svona dæmi. Hápunktur ferðarinnar var ferðin til Santorini, eldfjallaeyjunnar í eyjahafinu, alveg hreint mögnuð sjón, enda tók ég slatta af myndum þar, m.a. þessa sem fylgir hér og fleiri sem ég kem til með að dæla inná flickr næstu daga .
Sé smellt á hana kemstu inn á flickr....
meira síðar....

2005-09-23T12:58:00.000Z

Fór í kringluna (hvar ég tók þessa mynd) í gær til að kaupa
ferskan kóríander, aldrei til í hverfisbúðinni, hvað þá í bónus.
þyrfti bara að fara að rækta þetta sjálf í eldhúsglugganum.
Er það ekki hægt?
Ég þori varla að nefna það við ykkur, núna þegar það er orðið svona kalt,
en ég er að fara í *eyjaferð* til Krítar á mánudaginn :)
Meiningin er að vera þar í viku en ég yrði ekki hissa þó ég týndist óvart
rétt fyrir brottför til baka....
Ég er í bráðskemmtilegu félagi sem heitir Eyjafélagið, tíu manna félag
sem hefur það á stefnuskrá sinni að fara út í eina eyju á ári - nóta bene-íslenska...
en í ár er félagið 10 ára og verður af því tilefni farið út í útlenska eyju !
Auk þess eiga þrír félagar merkisafmæli þetta árið og verður haldið uppá það í leiðinni.
JIBBÝ !!!!!!!!!

2005-09-21T17:32:00.000Z

Aðeins að prófa hvernig þetta kemur út,
komin svona óeirð í mig, verð að breyta
eitthvað til ;)
Þessi mynd er af dótakassa Kolbeins
Helgusætusonar sem var óvart
skilinn eftir úti í rigningunni,
betra að smella á hana og skoða hana stærri....
Þessi mynd minnir mig dálítið á
lakkrískonfekt....

2005-09-20T22:08:00.000Z

Hér kemur keðjuklukk, sem ég fékk á mig...
verð að blogga 5 ómerkilegar staðreyndir um mig
og klukka svo aðra fimm !
1. Væri með skófeddiss ef ég væri ekki með svona yfirgengilega breiða rist á báðum... því ég á mjög auðvelt með að sjá fegurð í skótaui. Þetta ristar-snið mitt frestaði giftingu minni um mörg ár, jafn mörg og það tók að finna passandi brúðarskó....Ég nota sama skónúmer og Andrés Önd !

2. Í kvöldmat dagsins matreiddi ég svikinn héra uppúr matreiðslubókinni Við matreiðum- eftir Önnu Gísladóttur og Bryndísi Steinþórsdóttur.....
Þetta var í FYRSTA skipti á minni nokkuð löngu og viðburðaríku ævi sem ég smakkaði Svikinn Héra !!! - og mér þótti hann góður :)

3. Mér finnst gaman að dansa - sérstaklega í myrkri , svo það er eins gott að maður lendi ekki á elliheimili þar sem eru böll um miðjan dag :)

4. Ég er ekki hrifin af kökum og tertum .... nema brauðtertum.
Í veislum gúffa ég í mig flatkökunum með hangikjötinu og brauðréttunum........plús upprúlluðu pönnukökunum.

5. Vanilluilmur er minn uppáhalds - í ilmkertum...........Þar fyrir utan er lyktin af olíulitum best í heimi !

2005-09-19T11:31:00.000Z

Kvöldmaturinn á laugardag var framreiddur í þessari fagurbleiku skál.
Kassadömunni í hverfisbúðinni varð að ósk sinni á föstudaginn þegar
hún óskaði mér góðrar helgar, því helgin var bæði ljúf og góð :)
En nú er kominn mánudagur og við vorum vakin hressilega fyrir allar aldir
við eitthvað sem líktist jarðskjálfta af stærri gerðinni. Húsið nööööötraði.
Ég spratt framúr og svitaperlurnar gusuðust í allar áttir eins og í teiknimyndasögu.
Við athugun kom í ljós að verið var að þjappa grundina fyrir framan húsið
með stórvirkri þartilgerðri vinnuvél, akkúrat ekkert þægilegt við það.
Nú er ekki bara verið að bauka framan við húsið , heldur er
búið að berja niður tröppurnar bakdyramegin, þær sem liggja út í
garð,-með kúbeini !
Kettirnir eru gjörsamlega að fríka út, sérstaklega strákurinn Snúður,
sem er með lítið hjarta miðað við búk, músarhjarta. Hann grét svoleiðis í morgun
þegar húsið nötraði og skalf undan þjapparavélinni að mér leist
ekkert á blikuna.
Rúsína var meira kúl enda gömul og lífsreynd.
Og nú á að leggja hitalagnir á grundina og síðan verður malbikað yfir allt saman.
Aumingjans kettirnir :(

2005-09-17T13:32:00.000Z

Verð að monta mig smá núna : Þessa mynd tók ég í forstofunni hjá Bryndísi systur og Garðari í fyrrakvöld. Fyrirsætan í fallegu doppóttu skónum er Laufey vinkona. Ég dældi henni inn á myndablogglandið flickr í gær og mér til undrunar og ánægju sá ég í morgun að hún hafði fengið sérstaka viðurkenningu í blogglandinu þar ;)
Á *flickr* eru yfir milljón notendur um allan heim og þar er dælt inn sæg af myndum á hverjum degi. Þarna eru allskonar dómnefndir og starfsfólk sem pikka út myndir og þegar slíkt gerist eykst aðsóknin til muna að myndabanka viðkomandi.
Ég er búin að vera þarna síðan í febrúar í ár og þetta er í fyrsta skipti sem mynd eftir mig kemst í svona úrval !
ef þið smellið á myndina eruð þið komin inn í myndabankann minn og sjáið auk þess myndina stærri.
Ég hef notað flickr m.a. til að blogga myndum hér á síðunni.
endilega kíkið þarna inn :)

2005-09-15T13:52:00.000Z

Loksins gerðist eitthvað alveg brilljant skemmtilegt !
Mamma mín tók skyndiákvörðun í morgun, hringdi í eppla búðina og pantaði sér ibook makka fartölvu ....JESS !
Hún býr á Ísafirði og er 76 ára gömul og ætlar nú að fara að vinna í ljósmyndum.
Hún hefur alltaf tekið mikið af myndum,(ég hef líklegast myndadelluna frá henni-) og fékk sér fyrstu digital myndavélina í ágúst s.l. þegar eldgamla myndavélin hennar söng sitt síðasta.
Þegar ég spjallaði við hana í síma í morgun og spurði hvernig gengi að nota nýju myndavélina sagði hún að hún væri hálf fötluð með hana því hún gæti ekkert dælt myndunum neitt úr henni sjálf, ég fór þá að tala um að hún þyrfti eiginlega að fá sér tölvu til að græja þetta, sagði henni frá ibook tilboði sem ég sá í blöðunum í vikunni.
Hún hringdi svo rétt áðan og sagðist vera búin að panta sér gripinn ;) Hún hefur aldrei átt tölvu. Ég kem svo til með að leiðbeina henni símleiðis og svo kemur hún suður í smáskreppitúr í október og þá er hægt að leiðbeina enn frekar. Það er aldeilis að tæknivæðast heimili foreldra minna, því pabbi fékk sér upptökutæki fyrir ári og er farinn að taka upp sína tónlist sjálfur.
Nú bíð ég spennt- því hún hefur mjög gott mynd-auga og tekur skemmtilegar myndir, það verður spennandi að fylgjast með þegar hún fer að vinna úr þeim sjálf.
Annars er allt við það sama hjá mér....ég er bara að mála og svona ;)

2005-09-11T16:07:00.000Z

Smeygði mér í göngugallann, margvafði trefli um hálsinn og bauð mínum í spássitúr uppí Heiðmörk. Var búin að vera að reyna að telja sjálfri mér trú um að það væri bara gluggaveður en tók mig svo saman og hætti þessu þögla voli . Sé ekki eftir því, svo gott fyrir sál og kropp að skottast einn hring eftir malargöngustíg inná milli trjánna. Fallegt og hressandi !
Ég er mjög óminnug á afmælisdaga en einn man ég alltaf (undanfarin ár og örugglega um alla framtíð) Magga svilkona á afmæli í dag, 11. september ...
Til lukku með það, pæja !

2005-09-10T18:07:00.000Z

Þennan gaur ætlum við að hafa í kvöldmatinn.
Gíslinn var að koma út veiðitúr með fjóra laxa.
Við ætlum bara að sjóða hann og hafa sítrónu, kartöflur og smjör með
- bara basic dæmi.
Í gærkvöldi var hinsvegar flóknari eldamennska, ég útbjó indverskar kofta karrý kjötbollur og bauð Margréti í mat. Eina máltíðin sem ég nennti að elda á meðan veiðimaðurinn var fjarverandi.

2005-09-07T12:19:00.000Z

Það er ekkert lát á framkvæmdunum hér á lóðinni, skurðunum fjölgar og sömuleiðis iðnaðarmönnunum og vinnuvélunum. Þetta er kannski eins og með okkur mannfólkið, þegar við byrjum að grufla og grafa dúkkar alltaf eitthvað nýtt upp sem við gerðum ekki ráð fyrir (ein djúp).
Það er bót í máli að veðrið er mjög fallegt og ferskt.....

2005-09-04T12:42:00.000Z

Ég er á einhverju litaflippi þessa dagana...
Mála allt í sterkum litum- engar málamiðlanir.
Búin að leggja undir mig stofuna því þar er besta birtan. Borðstofuborðið hefur breystst í litaland, haugur af litatúpum, penslum og blindrömmum.
Engin matarboð hér í nánustu framtíð ;)
p.s. sé smellt á myndirnar má sjá þær stærri....

2005-09-02T13:18:00.000Z

Joe Cocker var flottur í gær, einskonar karlútgáfa af Edidt Piaf því hann söng af svo mikilli innlifun, var svartklæddur og hreyfði hendurnar eins og Piaf, söng með höndunum og reyndar öllum skrokknum.
Þegar hann rak upp flotta ljónsöskrið í with a little help from my friends, ætlaði allt um koll að keyra í fagnaðarlátum, maðurinn öskraði eins og táningur , ekkert að spara sig. Stórkostlegur soal-söngvari, þessi eitthvað í kringum sextugi maður !

Heimilið mitt er eins og járnbrautarstöð þessa dagana, hér vappa iðnaðarmenn út og inn, eru búnir að bora gat á húsið og grafa djúpan skurð við innganginn, því nú stendur til að skipta um hitaleiðslurnar sem komnar eru á síðasta snúning, og fleiri leiðslur í leiðinni. Þetta er verið að gera í öllu u-inu. Eins gott að maður er í þokkalegu formi því maður þarf að fljúga yfir skurðinn eins og loftfimleikakvendi og hefur ekki einu sinni trjágrein til að grípa í hinum megin því búið er að fjarlægja allar aspirnar !
Tarsan - swingið bliknar bara í samanburði við sveiflurnar sem við tökum hér, íbúarnir í þessu u-i.
Hóstinn minn er allur að skána og orðinn mun fallegri, ef hægt er að tala um fallegan hósta. Vona að hann láti sig bara alveg hverfa um helgina svo ég geti farið að stunda mína pollagalla- göngutúra af krafti aftur.....
Er í góðu málarastuði og sé fyrir mér miklar penslasveiflur um helgina - Það verður mitt djamm !

2005-08-31T19:20:00.000Z

Kvöldmatur dagsins : sigin grásleppa og allir sáttir, erfitt að klúðra henni.
Annars er það helst í fréttum að kvefruglið mitt er ekkert almennilega að gefa sig svo ég fór í apótek í dag og fékk mér hóstasaft og samkvæmt ráðleggingu afgreiðslukonunnar eitthvað sem heitir panodil HOT (!) með kirsuberjum og mentholi, sem ég á að leysa upp í soðnu vatni og skella í mig fyrir svefninn.... allt er nú til !
Það er mikið að gera hjá köttunum mínum þessa dagana því eins og áður hefur komið fram er verið að rústa allri lóðinni hér hjá okkur og daglega eru miklar breytingar á svæðinu, margar litlar gröfur að tæta og trylla hér um allt.
Kettir þola ekki svona breytingar og í lok dags þegar vinnuflokkurinn er farinn burt læðast kisurnar út og rannsaka allt hátt og lágt, nudda sér utan í hvern lófastóran blett til að merkja sér svæðið-
Daginn eftir er allt komið í rugl aftur svo þá þarf að endurtaka ritúalið.
fleira var það ekki að sinni.....hóst- hóst.....

2005-08-31T00:16:00.000Z

Það var engin áhætta tekin í kvöld, heldur brunað með frúna á skyndibitastað, og ekki bara það, heldur var ferðin notuð til að sækja tvo miða á Joe Cocker tónleikana á fimmtudagskvöld !!! Nú verður gaman ;)
Ætli maður verði látinn blása
í blöðru við innganginn?

2005-08-29T21:27:00.000Z

Ekki laust við að maður öfundi þessi dýr. Liggja malandi í bæli sínu, áhyggjulaus, fá engan gluggapóst, þurfa ekkert að þrífa eftir sig, ekkert að standa skil á neinu, geta bara VERIÐ !
Ekki eins og við, sem höldum alltaf að við þurfum að vera eitthvað, það sé ekki nóg bara að V e r a.
Þetta var ég að hugsa um þegar ég hlunkaðist uppúr djúpa stólnum til að elda kvöldmat án þess að eiga nokkurt hráefni af viti.
Ég er lík köttunum að einu leiti allavega, er með svona ritúal eða þráhyggju varðandi eitt atriði, nefnilega að búa alltaf til kvöldmat. (kettirnir beina reyndar þessari hegðun sinni í aðrar áttir en matargerð)
Mér slær niður af flensunni í hvert sinn sem ég laumast út, svo í dag ákvað ég að vera bara inni , fór ekki einu sinni út í búð að kaupa í matinn.
Og hvað var svo til í matinn ? Ég dró út allar skúffur og skápa og fann þetta : hrísgrjón, 4 kartöflur, niðursneiddar möndlur (!), hvítlauk, linsubaunir og oggulítið tómatmauk. Einnig átti ég pínulítinn afgang af kjúklingi gærdagsins.
Ég byrjaði að elda án þess að hugsa nokkuð um hvað ég ætlaði að gera, held ég hafi hugsað pottrétt, og hagaði mér samkvæmt því í upphafi en í miðju kafi fékk ég nýja hugmynd : buff ! Sigtaði pottréttinn , maukaði hann og kryddaði svo duglega .
Datt nú í hug að sniðugt væri að kíkja í matreiðslubók, þar sem ég hef aldrei búið til linsubaunabuff . Þar komst ég að því að ég var búin að gera allt sem á ekki að gera, ég var búin að mauka soðninguna í matvinnsluvél (bannað) og ætlaði nú að fara að steikja buffin sjóðheit (látið standa í ísskáp a.m.k. 1 og hálfan tíma fyrir steikingu, annars verður þetta leðja ).... Og þetta var sko leðja !
Reyndi að bjarga þessu með því að velta uppúr kartöflumjöli, sesamfræjum og sneiddu möndlunum og skutlaði þessu á pönnuna ..hm... erfitt að snúa leðju við og steikja á bakhliðinni....Ég sauð svo hrísgrjónin , smakkaði leðjuna til en fannst hún mjög einkennileg á bragðið. Ákvað því að redda því með því að hafa hrísgrjónin góð á bragðið.... og hvað átti ég til þess? jú olíu, balsamikedik og t.d. hrásykur ! jibbý ! Bjó semsagt til salat-dressingu á hrísgrjónin sem urðu mjög laus við að vera girnileg þegar ég var búin að hræra svartri dressingunni yfir. Að lokum hitaði ég kjúklinga restina sem ég átti (örfáa munnbita) og skellti þessu öllu á borðið .
Þetta var ótrúlega ljótur kvöldmatur, svo ljótur að við fengum hláturskast sem þróaðist reyndar í hóstakast hjá mér.
Svo bara borðuðum við leðjuna með hnífum og göfflum, eins og um stinn og góð buff væri að ræða.....það var ekkert annað að gera í stöðunni ! ...amen.....

2005-08-27T17:00:00.000Z

Í dag giftust Bjarki og Dóra á Ísafirði og vesalings ég komst ekki í brúðkaupið vegna veikinda- hefði eyðilagt þessa stund með ljótum hóstaköstum því ég er með hörku bronkítis. Viðar brunaði vestur svo ég sendi brúðargjöfina með honum , þessa pappamassamynd. Ég hefði gjarnan viljað vera fyrir vestan því ég veit að þetta er eitt af þessum alvöru-skemmtilegu brúðkaupum... en svona er lifið stundum- ekki alltaf karnival ! Óska Brúðhjónunum alls hins besta um alla framtíð !

2005-08-25T18:56:00.000Z

Það er búin að vera rauð risaeðla fyrir utan húsið mitt í tvo daga.
Hún er að rústa sameiginlegu torgi íbúanna hér í u-inu,
því nú á að breyta og bæta.
Þarna voru nokkrar 30 ára gamlar aspir hverjar höfðu rætur sem líkjast risakolkröbbum og bara tímaspursmál hvenær þær sprengdu sér leið inn í húsin og rifu í sundur allar lagnir þvers og kruss.
Það hefði ekki verið gaman að fá svona kolkrabbarót upp úr klósettinu einn góðan veðurdag, hefði maður setið þar í sakleysi sínu og lesið sitt andrésblað.
Mjög skrítið og berangurslegt um að litast núna. Ekki laust við að ég sakni þeirra.

2005-08-23T14:58:00.000Z

What Famous Leader Are You?
personality tests by similarminds.com

Ég hlýt að hafa misskilið spurningarnar eitthvað ! Kannski ég ætti að skella mér á ensku námskeið í vetur? ;)

2005-08-21T17:28:00.000Z

Menningarnótt....

Tók böns af myndum af flugeldasýningunni undan regnhlíf og þessi fannst mér best. Flott flugeldasýning en það byrjaði að rigna um leið og fyrsta ragettan fór á loft og kólnaði ískyggilega. Ég hefði ekki átt að vera í jólakjólnum undir þunnri regnúlpu, heldur einhverjum efnismeiri flíkum. Nú er ég að súpa seiðið af því, með bólginn háls og sírennsli úr nefi. Líður eins og litlu veiku barni sem bíður eftir að mamma fari út í búð og kaupi nýjasta hefti af Andrés Önd , því þannig gekk það fyrir sig í den , þá sjaldan ég veiktist...reyndar var það Andres And og & , því þá var ekki farið að þýða hann .